असनय् पार्किङ व गाडी बन्द
येँ (नेपालभाषा टाइम्स)÷असं व न्हू सतकय् दुहां वइगु गाडीयात म्हिगःनिसें थनया खुला मञ्चय् पार्किङ याकेगु व्यवस्था याःगु दु । आः वइगु मोहनिजःछि असं, भोताहिति व न्हू सतकय् गाडी दुकायेके मबीगु नीति कथं येँ महानगरपालिकां थ्व व्यवस्था याःगु खः ।
अथे हे असं लागाय् बँपसः लिसें दबुलिइ तयातःगु पसः चीकेधुंकाः म्हिगः महानगरपालिकां असनय् लः छ्वाकाः सफा याःगु दु । सफा यायेत धाःसा सफाइ मजदूर मखुसें नगर प्रहरीया जवानतय्त छ्यःगु खः ।
असनय् भिडभाड कम यायेगु नामय् अन दिकातःगु मोटरसाइकल फुक्क मनपाया गाडी हयाः ल्ह्वना यंकेगु ज्या याःगुलिं स्थानीय व्यवसायीत थःपिं हे जानाः अन तयातःगु व्यवस्थित पार्किङ नं आः बन्द जूगु दु । थुकिं यानाः असनय् लाथेपाथे थासय् मोटरसाइकल दिकेगु ज्या जूगु खनेदु ।
असनय् बँपसःत चीकूगुलिं पसःया ल्याः यक्व म्हो जूगु व आः वयाः पसः वयाच्वंपिं मनूतय्गु मोटरसाइकल हे ल्ह्वना यंकूगुलिं पिनेयापिं मनूत असनय् सामान न्यायेत हे मवइगु खः लाकि धइगु चिउताः व्यवसायीतय्सं प्वंका हयाच्वंगु खँ स्थानीय व्यवसायी यज्ञरत्न तुलाधरं कनादीगु दु ।
LEAVE YOUR COMMENTS