दाहालया वक्तव्यं पार्टीइ विवाद

येँ – दक्षिण अमेरिकी देय् भेनेजुएलाय् विकसित जूगु राजनीतिक अवस्थाया कयाः सत्तारुढ दल नेकपाया अध्यक्ष पुष्पकमल दाहालं जारी याःगु वक्तव्यं यानाः पार्टी दुने थीथी कथंया विवाद ब्वलंगु खँ सीदुगु दु । पार्टीया मेम्ह अध्यक्ष लिसें प्रधानमन्त्री केपी ओली देशय् मदुगु इलय् दाहालपाखें अज्याःगु वक्तव्य पिकयादीगु खः ।

सत्तारुढ दलया अध्यक्षपाखें अज्याःगु वक्तव्य जारी जुइवं आः भेनेजुएलाया मामिलाय् सरकारं नं अज्याःगु हे वक्तव्य जारी यायेमाः धकाः दबाब लाः वंगु खँ सूत्रं धाःगु दु । भेनेजुएलाया मामिलाय् अमेरिका लगायत युरोपया थीथी देशं समेत थःगु सरोकार क्यनाः वक्तव्य बीधुंकूगु दु । अथे खःसां नेपाःया जःलाखःला देय् चीन व भारतं धाःसा आः तक थुकिया बारे छुं न्ववाःगु मदुनि ।

अन्तर्राष्ट्रिय मामिलाय् न्ववायेगु लागिं नेकपाया थःगु हे विदेश विभाग दुसां अध्यक्ष दाहालपाखें कडा वक्तव्य जारी याःगु कारणं नं पार्टी दुने चर्चा जूगु खः । अमेरिकाया नां मकासे उगु देशया विरोध यानातःगु थ्व वक्तव्ययात कयाः अमेरिकी दूतावासं नं असन्तुष्टि प्वंकेधुंकूगु खँ धाःगु दु ।थ्वहे झ्वलय् दाहालया पुलांगु पार्टी माओवादी वैद्यपाखें नं अध्यक्ष मोहन वैद्यं दाहाललिसे हे ज्वःलाःगु व्यहोरा तयाः वक्तव्य जारी यानादीगु दु ।