थनिंनिसें निवार्चन आचारसंहिता लागू

येँ (नेपालभाषा टाइम्स)- वइगु मंसिर ४ गते जुइगु प्रतिनिधिसभा व प्रदेशसभा चुनावया निंतिं निर्वाचन आयोगं आचार संहिता लागू याःगु दु । म्हिगः चान्हय् १२ बजे निसें निर्वाचन आचार संहिता पूर्ण रुपं लागू जूगु खँ आयोगया प्रवक्ता शालिग्राम शर्मा पौडेलं कनादीगु दु ।

आयोगं वंगु आइतवाः जक थीथी राजनीतिक पार्टीया शीर्ष नेतातय्त सःताः निर्वाचन आचार संहिताया कार्यान्वयन नापं राजनीतिक दलतय्त आचार संहिता पालनाय् प्रतिबद्ध दु धकाः हस्ताक्षर याकूगु खः । आयोगया कथं सरकार व गैरसरकारी निकाय नापं मतदातातय्त नं आचार संहिता लागू जुइ । आयोगं निर्वाचनयात स्वच्छता, निष्पक्षता, पारदर्शिता व भयमुक्त वातावरण कायम यायोत आचार संहिता सकस्यां पालना यायेमाःगु खँ धाःगु दु ।

आचार संहिताया परिच्छेद ३ स नेपाल सरकार, प्रदेश सरकार, मन्त्री व स्थानीय कार्यपालिका लगायत उकिया पदाधिकारीतय्सं नं आचार संहिता पालना यायेमाःगु खँ न्ह्यथनातःगु दु । थ्व आचार संहिता कथं सरकारय् दुपिं मन्त्री व स्थानीय कार्यपालिकाया पदाधिकारीतय्सं गुगुं नं राजनीतिक दल वा उम्मेदवारया पक्ष वा विपक्षय् प्रचार प्रसार याये दइ मखु । तर निर्वाचनय् थः हे उम्मेदवार जूपिं मन्त्रीं थः उम्मेदवार जूगु क्षेत्रय् धाःसा प्रचार याये दइ । तर प्रचारय् वनेबलय् सरकारी स्रोत साधन धाःसा छ्यले दइ मखु । उकथं हे वार्षिक बजेट व ज्याझ्वलय् स्वीकृत जूगु बाहेक आः सरकारं छुं नं न्हूगु ज्या नं याये दइ मखु । तर सरुवा रोगया महामारी वा प्राकृतिक विपद सिर्जना जुल धाःसा आयोगया स्वीकृति कयाः अज्याःगु ज्या यायेदइ ।

लिसें आः गुगुं राजनीतिक पदया सिर्जना, नियुक्ति, भत्ता बृद्धि, आर्थिक सुविधा लिसें पुरस्कार नं बी दइ मखु । निर्वाचन सिमधःतले सरकारं कर्मचारी सरुवा नं याये दइ मखु । उकथं हे आयोगया अनुमति दुगु बाहेक गनं नं वैदेशिक भ्रमणय् वनेत नं सरकार व मन्त्रीयात बन्देज लगे जुइ ।

थ्वहे झ्वलय् कांग्रेसं निर्वाचन आयोगं मन्त्री प्रधानमन्त्रीपिंत नं निर्वाचन प्रचार प्रसारय् वनेगुपाखें आचार संहितापाखे पनेत स्वःगु पाय्छि मजू धकाः टिप्पणी याःगु दु । कांग्रेसया पार्टी ज्याकुथी जूगु पत्रकार सम्मेलनय् इनाबिउगु प्रेस विज्ञप्तिइ उगु खँ न्ह्यथनातःगु खः ।

पत्रकार सम्मेलनय् कांग्रेस प्रवक्ता प्रकाशशरण महतं धयादिल, ‘गठबन्धन दलत व प्रतिपक्षी दलं तकं प्रधानमन्त्री व मन्त्रीं प्रचारय् वने मदइगु प्रावधान व्यवहारिक मजू धयाच्वंगु दु, प्रधानमन्त्री देय्या कार्यकारी प्रमुख जूगुलिं न्हिथंया भ्रमणय् वने मालीगु स्वाभाविक खः, प्रधानमन्त्री जिमिगु पार्टीया सभापति नं खः, मन्त्रीत नं पार्टीया महत्वपूर्ण जिम्मेवारी दुगुलिं थःगु पार्टीया पक्षय् जनमत दयेकेत वने मदइगु धइगु खँ व्यावहारिक मजू, अन्तर्राष्ट्रिय अभ्यासयात तकं ध्यानय् तयाः निर्वाचन आयोग उगु व्यवस्थाय् लचिलो जुइमाः ।’

सम्बन्धित बुखँ

LEAVE YOUR COMMENTS