फास्ट ट्राय्क विरुद्ध कारण देखाउ
येँ – नेपाली सेनां दयेकाच्वंगु फास्ट ट्रायक विरुद्ध यलया ख्वना व बुंगया स्थानीय जनतां सर्वोच्च अदालतय् दायर याःगु रिटयात कयाः सरकार विरुद्ध कारण देखाउ आदेश जारी याःगु दु । थ्व मुद्दाय् थ्वहे वइगु माघ २९ गते वहस यायेगु कथं पेशी तोके याःगु दु । सर्वोच्चया न्यायाधीश पुरुषोत्तम भण्डारीया एकल इजलासं म्हिगः थ्व आदेश जारी याःगु खः ।
वंगु मंगलवाः ख्वनावासीया नामं दर्ता याःगु मुद्दायात कयाः पुलांम्ह महान्यायाधिवक्ता मुक्ति प्रधान व आदिवासी जनजाति वकिलतय् संस्था लाहुर्निपया महासचिव शंकर लिम्बुं बहस यानादीगु खः । बहस लिपा इजलासं सरकारया नामय् कारण देखाउ आदेश जारी याःगु खः ।
ख्वना व बुंगया स्थानीय वासिन्दा लगायत थीथी सांस्कृतिक गुथिया ५२ म्ह सर्वसाधारण जनतां मंकाः मुद्दा दर्ता याःगु खः । उकथं हे बुंगद्यःया खान्की गुथिया १३ म्ह गुथियारपिंसं नं बिस्कं मुद्दा दायर याःगु दु । मुद्दा दर्ता यायेगु झ्वलय् स्थानीय वासिन्दां सरकारं न्ह्याकेत्यंगु थीथी परियोजनाया कारणं पुस्तौंनिसें बसोबास याना वयाच्वंपिं व बुँज्या याना वयाच्वंपिंत जीविकोपार्जनपाखें विस्थापन याइगु खँ न्ह्यथंगु खः ।
गुथिया जग्गा अतिक्रमणय् लायेवं धर्म संस्कृति माने यायेत तकं समस्या जुइ धासें गुथियारतय्सं मेगु मुद्दा दायर याःगु खः । गुथिपाखें गुथियारतय्सं दायर याःगु मुद्दाय् प्रधानमन्त्री तथा मन्त्रिपरिषद् ज्याकूयात विपक्षी दयेका तःगु दु । फास्ट ट्राय्कं बुंगद्यःया खान्की गुथिया २८ रोपनी जग्गा अतिक्रमित जुइगु खँ धाःगु दु ।
न्यय्निम्हेस्यां तःगु रिट निवेदनय् धाःसा प्रधानमन्त्री तथा मन्त्रिपरिषद् ज्याकू लिसें च्यागू मन्त्रालय, नेपाली सेना, नापी विभाग, नेपाल विद्युत प्राधिकरण, पुरातत्व विभाग, काठमाडौं उपत्यका विकास प्राधिकरण, बाग्मती सभ्यता विकास आयोजना सहित २९ गू संस्थायात विपक्षी दयेकातःगु दु ।
रिट निवेदनय् ख्पना व बुंगय् न्ह्याकेत्यंगु फास्ट ट्रायक परियोजनां नेपाःया सविधान, २०७२ य् प्रत्याभूत यानातःगु मौलिक हक, विधिया शासन, नेपाल पक्ष दुगु अन्तर्राष्ट्रिय कानुनं प्रदत्त मानव अधिकार व सर्वोच्च अदालतं प्रतिपादित नजिर व सिद्धान्तया तकं उल्लंघन जूगु जिकिर यानातःगु दु ।
मुद्दा दर्ता यायेगु झ्वलय् संयुक्त राष्ट्र संघया आदिवासी जनताया अधिकार सम्बन्धी घोषणाया आधारयात तकं उल्लंघन याःगु धासें आदिवासी जनताया सहमति कयाः जक आदिवासी दुगु क्षेत्रय् सेना यंकेमाःगु प्रावधानयात तकं सरकारं वेवास्ता याःगु धासें तत्काल उकियात पनेमाःगु माग समेत यानातःगु दु ।
सर्वोच्चय् उगु रिट दायर यायेधुंकाः ख्वना व बुंगया पीडित जनतां मंगलवाः येँया माइतिघर मण्डलाय् च्वनाः प्रदर्शन नं याःगु खः । उगु इलय् उमिसं फास्ट ट्राय्कया कारणं सर्वसाधारण जनता व अनया संस्कृतियात लिच्वः लाइगु खँ च्वयाः ब्यानर नं ब्वःगु खः ।
LEAVE YOUR COMMENTS