
येँ – थौंकन्हय् बेलायतया भ्रमणय् वनाच्वंम्ह अमेरिकी राष्ट्रपति डोनाल्ड ट्रम्पया विरोधय् अन थाय्थासय् प्रदर्शन जुयाच्वंगु दु । राष्ट्रपति ट्रम्पं अज्याःगु प्रदर्शनीया दथुइ नं थःगु भ्रमण धाःसा जारी हे यानाच्वंगु दनि । थ्वहे झ्वलय् नेपाःया प्रधानमन्त्री केपी शर्मा ओलीं नं मेगु वालय् बेलायतया भ्रमण यानादीत्यंगु दु ।
थ्व भ्रमणय् वय्कःया विरोधय् नं अन प्रदर्शनत जुइगु सम्भावना अप्वःगु दु । ट्रम्प विरुद्ध बेलायती नागरिकतय्सं विरोध यानाच्वंगु खःसा प्रम ओली विरुद्ध धाःसा स्वयम् नेपाःमितय्सं हे विरोधया तयारी यानाच्वंगु खँ सीदुगु दु । वय्कःयात लण्डनस्थित भूपू गोर्खा सैनिकतय् छगू संगठनं विरोध प्रदर्शन यायेत्यंगु खः ।
प्रम ओली विरुद्ध यायेत्यंगु थ्व प्रदर्शनयात मेगु भूपू गोर्खा सैनिक संगठनं धाःसा आलोचना याःगु दु । प्रम ओली बेलायत वइबलय् वय्कःयात लसकुस यायेगु लाकि विरोध यायेगु धकाः थौंकन्हय् अन च्वंगु भूपू गोर्खा सैनिक संगठनतय् दथुइ हे मतभेद जुयाच्वंगु खँ सीदुगु दु ।
छगू पुचलं नेपाः सरकारं थःपिंत जुयाच्वंगु विभेद बारे बेलायत समक्ष खँ मल्ह्वंगुलिं विरोध यायेमाः धयाच्वंगु दुसा मेगु पुचलं धाःसा प्रमयात थ्वहे इलय् बेलायती समस्या बारे खँ तयेगु अवसर बीमाः धकाः सुझाव बियाच्वंगु दु ।
LEAVE YOUR COMMENTS