नेपालभाषाय् तामाङ सेलो म्येँ

येँ(नेपालभाषा टाइम्स)- नेपालभाषा संगीतय् न्हूकथंया पहः प्रयोग यायेगु झ्वलय् लिपांगु इलय् तामाङ समुदायया लोकंह्वाःगु तामाङ सेलो शैलीया म्येँया म्युजिक भिडियो पिहां वःगु दु । केबिएस लुभु प्रोडक्सनं नेपालभाषाय् तामाङ सेलो शैलीया म्येँया म्युजिक भिडियो प्रदर्शनय् हःगु खः ।

प्रोडक्सनया कजि केबीएस लुभुया परिकल्पनाय् तयार याःगु निपु म्येँया म्युजिक भिडियोया वंगु विहीवाः पितब्वज्या याःगु खः । निपुमध्ये छपु म्येँ तामाङ सेलो शैलीया खः । कृष्ण महर्जन व सरस्वति मानन्धरं सः बियादीगु ‘मैंचाया ग्वालिइ ….. ’ बोलया म्येँ अनिल तुलाधरं लसय् हनादीगु खः ।

म्युजिक भिडियोय् किरण जोशी, आराध्यलक्ष्मी खड्गी, अन्नपूर्णेश्वरी श्रेष्ठ, रवि डंगोल, महेश प्रकाश हाडा, राजाराम तण्डुकार, विगेन तुलाधर, पुजा महर्जन, रिया सुवाललिसें आपालं कलाकारं अभिनय दुसा निर्देशन बालमुकुन्द प्रजापतिं यानादीगु खः ।

थुकथं हे ‘जिमि बाज्यां हुक्का ….’ बोलया म्येँया म्युजिक भिडियोय् रबि डंगोल, मनोज महर्जन, निशा डंगोल, बिजेता महर्जन, शान्ता महर्जन, शर्मिला सिंह महर्जन, दिलिप प्रताप सिंहं अभिनय यानादीगु दु ।

वरिष्ठ कलाकार, निर्देशक पवन जोशीं निर्देशन यानादीगु म्युजिक भिडियोया म्येँ सुरज ब्याञ्जु थम्हं च्वयाः, लसय् हना हालादीगु खः ।