लुम्बिनीइ थेरवाद बौद्ध संग्रहालय पलिस्था

येँ – बौद्ध महिला संघ नेपालं लुम्बिनीस्थित धर्मोदय सभाया स्वयम्भू महाचैत्यय् नेपाल थेरवाद बौद्ध संग्रहालय पलिस्था याःगु दु । धर्मोदयसभापाखें लुम्बिनी दयेकातःगु स्वयम्भू महाचैत्यया गर्भय् उगु संग्रहालय चायेकूगु खः । अखिल नेपाल भिक्षु महासंघया नायः श्रद्धेय भिक्षु मैत्री महास्थविरपाखें पंचशील ग्रहण यासें न्ह्याःगु ज्याझ्वः संघया अध्यक्ष सुजाता मानन्धरया सभापतित्वय् जूगु खः । वंगु आइतवाः जूगु विशेष ज्याझ्वःया दथुइ उगु संग्रहालयया उलेज्या प्रदेश नं. ५ या मुख्यमन्त्री शंकर पोखरेलं यानादिल ।

संग्रहालय समुद्घाटन समारोहय् संघया पुलांम्ह नायःलिसें संग्रहालयया संयोजक डा. केशरीलक्ष्मी मानन्धरं लसकुस यानादिसें संग्रहालय चायेकेत थःपिं वःगु कुतः ताःलाकेत सफल जूगु जानकारी बियादिसें संग्रहालययात पूर्णता बीत सकसिनं थःथःगु थासं ग्वाहालि यानादीत इनाप यानादिल ।

उगु इलय् मुख्यमन्त्री पोखरेलं संग्रहालयया परिकल्पनाकार संग्रहालयविद् जलकृष्ण श्रेष्ठ व संग्रहालययात उचित रुपय् छायेपियादीम्ह कर्ण महर्जनयात कदरपत्र लःल्हानादीगु खः । अथे हे लुम्बिनी विकास कोषया उपाध्यक्ष भिक्षु मैत्तेयं संग्रहालय स्थापनाया निंतिं आर्थिक ग्वाहालि यानादीपिं दातापिं द्रव्यमान सिं तुलाधर, पंचवीर सिंह तुलाधर, ज्योति समूह, पद्मसागर तुलाधर, माधुरी मानन्धर, पंचकुमारी मानन्धर, डा. केशरीलक्ष्मी मानन्धर, डा. केशरी वज्राचार्य लगायतयात लुमन्ति चिं लःल्हाना बिज्याःगु खः ।

ज्याझ्वलय् नवासें मुख्यमन्त्री पोखरेलं लुम्बिनी ज्ञानभूमि, तपोभूमि जूगु धासें लुम्बिनीयात गुकथं म्हसीके फइ, लुम्बिनीया बारे अझ व्यापक रुपं गुकथं प्रचार याये फइ धइगु खँय् संग्रहालय स्थापनां छगू आयाम तनेगु ज्या जूगु दु धयादिल ।

वय्कलं लुम्बिनीइ चाःहिलेत वइपिंसं थ्व थासं बुद्ध शिक्षा, बुद्धया दर्शनलिसें ज्ञान गुणया खँ नं सीके वने फयेमा धइगु थःगु चाहना खः धयादिल । लुम्बिनी बौद्ध विश्वविद्यालयया उपकुलपति प्रा. डा. हृदयरत्न वज्राचार्य, संघया सल्लाहकार पद्मज्योति, प्रदेश सांसद लगायतं नुगःखँ तयादीगु ज्याझ्वलय् संघया उपाध्यक्ष मीरा ज्योतिं सुभाय् देछानादीगु खः ।

सम्बन्धित बुखँ

LEAVE YOUR COMMENTS