संविधान संशोधन गन थ्यन ?

येँ (नेपालभाषा टाइम्स)- एमाले व कांग्रेस जानाः गठन याःगु वर्तमान सरकारं संविधान संशोधनयात नं थःपिनि एजेण्डाया रुपय् न्ह्यःने हःगु खःसां सरकारं धाथें संविधान संशोधन याइला धइगु खँय् धाःसा आशंका ब्वलंगु दु । खास यानाः संविधान संशोधनया मुद्दा खोले जुइवं हे मधेसवादी दल व आदिवासी जनजातितय्सं थःपिनि एजेण्डा न्ह्यःने तयाः आन्दोलन याये फइगु सम्भावना दुगुलिं सत्तारुढ दलत संविधान संशोधनया खँ ल्हायेत इच्छुक मजुयावंगु खँ सूत्रं धाःगु दु ।

जानकार सूत्रतय्सं धाःकथं प्रधानमन्त्री केपीशर्मा ओली हे थ्व इलय् संविधान संशोधनया लागिं इच्छुक जुयाच्वंगु मदुनि । वय्कलं गनं नं न्ववाइबलय् संविधान संशोधन बारे छुं बिचाः तया च्वनादीगु खने मदु । वय्कः उपस्थित जुयादीगु ज्याझ्वलय् मेपिंसं संविधान संशोधनया खँ ल्ह्वना हःसां वय्कलं उकियात लिसः बीगु ज्या नं यानाच्वंगु मदु ।

छुं ई न्ह्यः तिनि प्रतिनिधिसभाया सभामुख देवराज घिमिरें नं छगू सार्वजनिक ज्याझ्वलय् न्ववायेगु झ्वलय् संविधान संशोधन आःया लागिं आवश्यक मुद्दा मखु धासें तत्काल संविधान संशोधनया सम्भावना मदुगु खँ स्पष्ट यानादीगु खः । सभामुख घिमिरे प्रम ओलीलिसे यक्व सतीम्ह नेता खः ।

सरकारं संविधान संशोधनया चर्चा याना हयेवं आदिवासी जनजातितय्सं खबरदारी यासें यदि समानुपातिक समावेशी सम्बन्धी छुं नं बुँदा घटे यात धाःसा उकिया विरुद्ध आन्दोलन यायेगु जुइ धकाः ख्याच्वः बियाहःगु दु । अथे हे मधेशवादी दलतय्सं नं संविधान संशोधनया मुद्दा ‘ओपन’ जुइवं हे अन थःपिनि एजेण्डा न्ह्यःने तयाः संघर्ष याइगु संकेत खने दयावःगु खँ सूत्रं धाःगु दु । मधेशवादी दलतय्सं संविधान संशोधनय् थःपिनि एजेण्डा न्ह्यःने तल धाःसा उकियात भारतं समर्थन याइगु व नेपाःयात दबाब वये फइगु खँयात समेत ध्यानय् तयाः ओली सतर्क जूगु खँ सूत्रं धाःगु दु । खास यानाः नेपाःया संविधानय् ‘हिन्दू राष्ट्र’ तयेकेगु लागिं भारतपाखें दबाब वये फइगु अनुमान यानाहःगु दु ।

अथे हे जुजुवादीतय्सं नं संविधान संशोधन यानाः राजतन्त्र व हिन्दू राष्ट्र पुनस्र्थापना यायेमाः धकाः दबाब बियाच्वंगु जुयाः संशोधनया तयारी जुइवं हे थ्व पक्ष सक्रिय जुइफइगु खँय् नं राजनीतिक दलत सतर्क जूगु खँ सूत्रं धाःगु दु ।

थुपिं फुक्क पक्षं न्ह्यःने हइगु एजेण्डायात वेवास्ता यात धाःसा उमिसं समर्थन मयाइगु व संशोधनया लागिं आवश्यक दुई तिहाइ मत मगाइगु जुयाः सरकारया थ्व कुतः ताःलाइगु सम्भावना म्हो जक दुगु विश्लेषण नं थन यानाहःगु दु । अथे हे आः सरकारय् दुथ्याःगु राजनीतिक दलत नं पश्चगमनकारी संशोधनया पक्षय् वनीगु सम्भावना मदुगु खँ धयाहःगु दु ।