मायादेवी बाय् च्वंगु पुखू न्हंकाः वडा ज्याकू

येँ –पश्चिम नेपाःया तिलोत्तमा नगरपालिकाय् वंगु छुं ला न्ह्यः तिनि भगवान बुद्धया न्यागू मूर्ति तोडफोड यानाः वांछ्वयातःगु खः । आः वहे नगरपालिकाया वडा नं ११ य् च्वंगु बुद्धलिसे सम्बन्धित छगू पुखू स्यंकाः अन वडा कार्यालय दयेकेगु ज्या न्ह्याकाच्वंगु दु ।

सुनां व गबले दयेकूगु धइगु सी मदुनिगु उगु ऐतिहासिक पुखूया नापसं बुद्धया मां मायादेवी बाय् च्वंगु धइगु किंवदन्ती दु । सिद्धार्थ गौतम प्वाथय् दुबलय् थःछेँ देवदह वनाच्वंगु इलय् थ्वहे पुखूया नापसं कुमारवर्तीइ बाय् च्वंगु धाइ । अन मायादेवीया छगू मूर्तिया नापं छगः प्राचीन शैलीया तुं नं दु । उकिं थ्व पुखूयात स्थानीय मनूतय्सं पवित्र व ऐतिहासिक महत्व दुगु थाय्या रुपय् कायेगु याः ।

आः तिलोत्तम नगरपालिकां थःगु वडा कार्यालय वहे पुखू ल्हानाः दयेकेत्यंगु खँय् धाःसा स्थानीय जनतां आश्चर्य प्वंकूगु दु । वडाया ज्याकू तयेगु लागिं दकलय् पायक जूगु थाय् जूगुलिं थन हे ज्याकू दयेकेत्यनागु खँ अनया वडा अध्यक्ष मुक्तिराम चौधरीं कनादीगु दु । वडा कार्यालय दयेकेगु लागिं अन जग मुयाः ढलान समेत यायेधुंकूगु दु । वडा कार्यालय दयेकेधुंकाः ल्यं दनिगु पुखूयात ‘गजबनक्सां’ संरक्षण यायेगु खँ वय्कलं कनादीगु दु ।

नगरपालिका थगुने तिनि ‘छगू वडा छगू पुखू’ धइगु नारा सहित विकास निर्माण यायेगु ग्यसाः न्ह्यःने हःगु खः । आः धाःसा दुगु नापं त्यला काःगुलिं स्थानीय मनूत अजूचायाच्वंगु दु ।