मजिमगाःगु थासय् ट्राफिक मत जडान

येँ – येँया मुख्य सतक अन्तर्गत थीथी च्यागू थासय् ट्राफिक मत जडान यायेगु ज्या शुरु जूगु दु । येँया आपालं थासय् सतक मतया आवश्यक दुगु खःसां नं तत्कालया निंतिं मदयेक मगाःगु व दकलय् अप्वः आवश्यक जूगु थाय् छनोट यानाः उकथं ट्राफिक मत जडान यायेगु ज्या न्ह्याकूगु खः ।

सडक विभागं येँया गौशाला, मित्रपार्क, सिंहदरवार, पद्मोदय घुम्ती, बागबजाः, तिनकुने, कालिमाति, पुलांगु बानेश्वर आदि थासय् उकथं ट्राफिक मत जडान याःगु खः । विभागं ट्राफिक मत जडानया निंतिं न्हापा दुगु व आः स्यनाच्वंगु नापं द हे मदुगु निगू कथंया थाय् छनोट यानाः मत गडानया प्रक्रिया न्ह्याकूगु खः ।

आः मत जडान जूगु थासय् न्हापां छवाःया निंतिं मतया परीक्षण यायेगु व ट्राफिक प्रहरीयात प्रशिक्षण बीगु विभागया सुरक्षा तथा ट्राफिक महाशाखा प्रमुख दिप वाराहीं कनादिल । ट्राफिक मत जडानया निंतिं तीनकुने, पुलांगु बानेश्वर व चाबहीया मित्रपार्कय् आवश्यक पूर्वाधार निर्माण यायेगु ज्या जुयाच्वंगु धासें दक्वं थासय् वइगु लछिया दुने मत जडानया दक्वं ज्या क्वचाइगु आशा यानागु वय्कलं धयादिल ।

कालिमातिया चोकय् मत जडान यायेगु ज्या सिधयेधुंकूगु व पद्मोदय व सिंहदरवार न्ह्यःन जडानया ज्या लिपांगु चरणय् थ्यने धुंकूगु नं वय्कलं जानकारी बियादिल । स्वनिगलय् दँयदसं सवारी साधनया चाप उच्च मात्राय् अप्वया वनाच्वंगु दुसा थाय्थासय् आवश्यककथंया ट्राफिक मत मदुगुलिं समस्या जुयाः ट्राफिक व्यवस्थापनय् समस्या जुइगु जक मखसे दुर्घटना तकं जुइगु यानाच्वंगु दु ।