स्वंगू प्रज्ञा प्रतिष्ठानयात मस्वाकेत ज्ञापन पौ

येँ – सरकारं स्वंगू प्रज्ञा प्रतिष्ठानयात छगू हे यायेकथं हःगु योजनायात सरोकारवालातय्सं चिउताः प्वंकूगु दु । नेपाल प्रज्ञा प्रतिष्ठान, नेपाल संगीत तथा नाट्य प्रज्ञा प्रतिष्ठान व नेपाल ललितकला प्रज्ञा प्रतिष्ठानयात छगुलिइ हे स्वाकेगु धकाः हःगु योजनायात उकथं मयायेत इनाप यासें सरोकारवालातय्सं चिउताः क्यंगु खः ।

नेपाल प्रज्ञा प्रतिष्ठानय् छुं दिं न्ह्यः जक जूगु छगू ज्याझ्वलय् संस्कृति, पर्यटन व नागरिक उड्डयन मन्त्री रवीन्द्र अधिकारीयात जनसांस्कृतिक महासंघया अध्यक्ष खगेन्द्र राई व जनसांस्कृतिक महासंघ नेपालया अध्यक्ष सरल सहयात्रीं स्वंगू प्रज्ञा–प्रतिष्ठान छगुलिइ हे मस्वाकेत इनाप यासें ज्ञापन पौ लःल्हाःगु खः ।

वइगु आर्थिक दँया बजेट सार्वजनिक यायेगु झ्वलय् सरकारं स्वंगुलिं प्रज्ञा–प्रतिष्ठानया ज्या छगू हे प्रकृतिया जूगु धासें उकिया स्वाकाः छगू हे यायेगु योजना हःगु खः। मन्त्री अधिकारीं ज्ञापन पौ लःल्हानाकासें स्वंगू प्रतिष्ठान छगू हे यानाः स्वायेगु योजना दुगु खँ वःगु खःसां आः तत्कालया निंतिं उकिया सम्बन्धय् अज्यःगु छुं निर्णय जूगु मदुनि धयादिल ।

वय्कलं प्रदेशय् प्रज्ञा संस्था दयेकेबलय् धाःसा छगू हे दयेकेगु तर केन्द्रय् आवश्यक अध्ययन यानाः जक थ्व सम्बन्धय् निर्ण यायेगु जुइ धयादिल । प्रतिष्ठानया गरिमायात च्वन्ह्याकेया निंतिं सरकार न्ह्यचिलाच्वंगु धासें उगु इलय् मन्त्री अधिकारीं स्वंगुलिं प्रज्ञा प्रतिष्ठानयात आः छगू हे बजेट फ्यानातःगु व अध्ययन लिपा जक छु यायेगु धइगु बारे सीदइगु जानकारी बियादिल ।

निगू महासंघं लःल्हाःगु ज्ञापन पती धयातःगु दु, ‘सरकारपाखें वःगु थ्व प्रस्ताव संस्कृति दुने दुगु विशिष्टतायात ध्यान मबिसे, उकिया अस्तित्व हे न्हंकेकथं, मेगु छुं विकल्पया बारे विचाः व उल्लखे यायेगु ज्या तकं मयासे वःगुलिं सरकारया मनशाय भिंगु हे जूसां उकिया प्रतिविम्बित जुइ फयाच्वंगु मदु । ’

सम्बन्धित बुखँ

LEAVE YOUR COMMENTS