निजगढ अन्तर्राष्ट्रिय विमानस्थल इलय् क्वचायेकेत संसदीय समितिया निर्देशन
येँ – संघीय संसद, राष्ट्रियसभा राष्ट्रिय सरोकार तथा समन्वय समितिं बारा निजगढय् दयेकाच्वंगु अन्तर्राष्ट्रिय विमानस्थल क्वःछिनातःगु इलय् क्वचायेकेत निर्देशन बिउगु दु । समितिं उगु विमानस्थल बारे याःगु विस्तृत अध्ययन, अवलोकन व सरोकारवाला पक्षलिसे सहलह लिपा विमानस्थल दयेकेगु झ्वलय् वये फइगु समस्या सम्बन्धय् सचेत याकुसें गुगुं नं बहानाय् विमानस्थल दयेकेगु ज्याय् पंगः मवयेकेत व इलय् दयेकेगु ज्या क्वचायेकेमाःगु निष्कर्ष पिकाःगु खः ।
समितिया म्हिगःया बैठकय् समितिया सभापति दिलकुमार रावल थापां विमानस्थलया निंतिं सिमांकन याःगु क्षेत्र टाँगिया वस्ती, काठगाउँ वस्तीया वासिन्दा विमानस्थल दयेकेगु निंतिं ग्वाहालि यायेगु उद्देश्यं तत्काल स्थानान्तरण जुइत तयार दुगुलिं याकनं स्थानान्तरण यायेमाःगु खँ कनादिल ।
समितिं आयोजनाया डीपीआर तयार यानाः चालु आर्थिक दँया दुने स्वीकृत यायेत आयोजना लिसें संस्कृति, पर्यटन तथा नागरिक उड्डयन मन्त्रालययात निर्देशन बिउगु दु । विमानस्थलया मुख्य धावनमार्गया रुपय् दुगु टाँगिया वस्तीया स्थानान्तरणया निंतिं तत्काल पाय्छिगु थाय् क्वःछिनाः उगु वस्तीया वासिन्दायात उपयुक्त थासय् स्थानान्तरण यानाः वस्ती व्यवस्थापनया ज्या न्ह्याकेत नं समितिं मन्त्रालययात निर्देशन बिउगु दु ।
निगूगु अन्तर्राष्ट्रिय विमानस्थल निजगढ बारा देशया पर्यटन प्रवद्र्धन व आर्थिक विकासया निंतिं जक मखुसें अन्तर्राष्ट्रियस्तरय् राष्ट्रया म्हसिका लिसें गौरव थकायेत तकं महत्वपूर्ण योगदान याइगु आयोजना खः । समितिं आयोजना स्थल दुनेया वस्ती स्थानान्तरण लिपा विमानस्थलया निंतिं माःगु पूर्वाधार दयेकेत माःगु थासय् सिमा पालेगुया लिसें विमानस्थल दयेकेगु ज्या तत्काल न्ह्याकेमाःगु व सिमा पाःगु वापत पीगु सिमाया सम्बन्धय् नं योजना पेश यायेत मन्त्रालययात निर्देशन बिउगु दु ।
समितिया सभापति थापां विमानस्थल दयेकेधुंकाः ब्वलनीगु रोजगारीया अवसर आयोजनां विस्थापित जुइपिं व स्थानीय वासिन्दायात विशेष प्राथमिकता बीगु व्यवस्था यायेत नं निर्देशन बिउगु दु । विमानस्थल दयेकेत स्थानीय सरोकारवाला फुक्कं छगू मत दुगु व आयोजना याकनं क्वचायेमाः धइगु पक्षय् आपालं जनताया बिचाः जूगु खँ धाःगु दु । विमानस्थल दयेकेधुंकाः तल्लोतटीय क्षेत्रय् सिँचाइया वैकल्पिक स्रोतया व्यवस्थापन यायेमाःगु व आयोजना दयेकेगु झ्वलय् चुरे क्षेत्रया संरक्षण यायेगु ज्याय् सजग जुइगु नं निर्देशन बिउगु दु ।
LEAVE YOUR COMMENTS