ने. सं. ११४४ कौलाथ्व तृतीया -

सवारी साधन पञ्जिकरण यायेत छाय् ई थप यात ?

येँ – मंसिर मसान्त दुने पञ्जिकरण मयाःगु सार्वजनिक सवारी साधनयात चले याके मबिइगु धाःगु सरकार हाकनं थ्व निर्णयं लिचिउगु दु । आः सरकारं पञ्जिकरण यायेगु ई फागुन मसान्त तक थप यानाबिउगु दु । मंसिर मसान्त क्वचाये छन्हु न्ह्यव स्वलाया ई थप यानाबिउगु खः ।

थ्वयां न्ह्यव यातायात व्यवस्था विभागं कम्पनी वा सहकारी दर्ता यानाः सवारी साधन पञ्जिकरण मयात धाःसा पुस १ गते निसें अज्याःगु सवारी साधन चले याके मबिइगु खँ धयातःगु खः । यातायात व्यवसायीतय्सं कम्पनी दर्ता यायेत कम्पनी ऐन हे वाधक जुयाच्वंगु धायेवं सरकारं ऐन संशोधन यायेत थप ई बिउगु खँ धाःगु दु ।

सवारी साधन पञ्जिकरण मयात धाःसा पुस १ गते निसें अज्याःगु सवारी साधन चले याके मबिइगु धाःगु सरकारं फागुन मसान्त तक म्याद थप याःगु दु ।

यातायात व्यवसायीतय्सं कम्पनी ऐन २०६३ या दफा ९ या उपदफा १या व्यवस्था बाधक दुगुलिं उकियात संशोधन यायेमाःगु खँ धाःगु खः । व्यवसायीतय्सं थ्व ऐन संशोधन यात धाःसा जक कम्पनी अन्तर्गत आवद्ध जुइगु शर्त तःगु खः । उमिगु शर्त कथं आः सरकारं ऐन संशोधन यायेगु तयारी याःगु खँ यातायात व्यवस्था विभागया महानिर्देशन लावण्यकुमार ढकालं बिबिसीयात धयादीगु दु ।

गृहमन्त्रीया संयोजकत्वय् उद्योगमन्त्री व भौतिक पूर्वाधार तथा यातायात मन्त्री लगायतया बैठकं थ्व पालय् अन्तिम पटक म्याद थप यायेगु क्वःछिउगु खँ नं विभागया महानिर्देशक ढकालं धयादीगु दु । वय्कःया कथं व्यवसायीतय्सं थ्व ऐन संशोधन जुल धाःसा छुं समस्या मजुइगु व सकलें व्यवसायीत कम्पनीइ दुहां वइ धकाः लिखित रुपं हे च्वया बिउगुलिं म्याद थप यानाबिउगु खः ।

कम्पनी ऐनया दफा ९ या उपदफा १ कथं प्राइभेट कम्पनीया शेयरधनीतय् ल्याः १०१ म्ह स्वयां अप्वः जुइ मजिउ । तर थौंकन्हय् अस्तित्वय् दुगु यातायात समितित निद्वलं मल्याक सदस्य दुगु तकं दु ।

थौंकन्हय् सार्वजनिक यातायात क्षेत्रय् न्यासगुलिं मल्याक समिति व संघत संचालनय् वयाच्वंगु दु । नेपाल यातायात व्यवसायी राष्ट्रिय महासंघ अन्तर्गत थौंकन्हय् देन्यंकं स्वंगू लाखं मल्याक सवारी साधन संचालनय् वयाच्वंगु दु ।