ख्वप नपाया झिंस्वक्वःगु नगरसभा

येँ(नेपालभाषा टाइम्स)- नेपाल मजदुर किसान पार्टीया नायः नारायणमान बिजुक्छेँ रोहितं निर्वाचनपाखें समाजवादी व्यवस्था लागू यायेगु विचाः संशोधनवाद खः धासें समाजवादी व्यवस्था स्थापनाया निंतिं सशस्त्र संघर्ष छगू जक उपाय जूगु नं चर्चा यानादीगु दु ।

वय्कलं उगु खँ ख्वप नगरपालिकाया झिंस्वक्वःगु नगरसभाया मूपाहांया थासं उलेज्या यासें धयादीगु खः । नगरसभाया पूर्ण सफलताया कामना यासें नायः रोहितं क्रान्तिया वातावरण तयार जूसां नं क्रान्ति मयायेगु दक्षिणपन्थी अवसरवाद व क्रान्तिया वातावरण तयार मजुनिवं क्रान्ति यायेगु वामपन्थी अवसरवादपाखें मुक्त जुयाः राजनीतिक संघर्षयात न्ह्यःने यंकेमाःगु खँय् नं बः बियादीगु दु ।

राजनीतिक दलयाके गबलय् राजनीतिक स्पष्टता दइमखु अबलय् नं गुगुं नं ज्या सफल जुइमखु धासें वय्कलं धयादिल, ‘पश्चिमा प्रजातन्त्र नाले धाःपिंसं हे उकिया सिद्धान्तयात बेवास्ता यानाः प्रमुख प्रतिपक्षीं हे सरकारयात समर्थन यागु राजनीतिइ गलत नजिर कायम यायेगु कुतः खः ।’

‘थःपिंत राष्ट्रपति पद दइ धइगु लोभं सिद्धान्तयात त्वःतेगु व पंचायतकालय् थें थःगु राजनीतिक पार्टीया सिद्धान्त व विचाःयात तकं वास्ता मयासे पार्टीया हे सांसदतय्सं थः यथे नवाना जुइगु चलन प्रजातन्त्रया मर्म अःखः जूगुलिं उकियात भिंकेगु ज्या मजूतले अज्याःगु राजनीतिक पार्टी सही जुइमखु’ वय्कलं धयादिल ।

ख्वप नगरपालिकाया प्रमुखलिसें ज्याझ्वःया सभापति सुनिल प्रजापतिं नगरसभा धइगु नगरपालिकाया व्यवस्थापिका थें जूगुलिं सभां संविधान व कानूनं बिउगु अधिकारया प्रयोग यानाः आवश्यक नीति, ऐन, कानून, निर्देशिक, कार्यविधि तयार याना वयाच्वनागु जानकारी बियादिल ।

नगरपालिकां शिक्षा, स्वास्थ्य, सम्पदा पुनःनिर्माण लगायतया क्षेत्रय् यानाच्वंगु ज्याया प्रगति विवरण न्ह्यब्वयादिसें वय्कलं नेमकिपा अध्यक्ष बिजुक्छें कल्पना यानादीगु सछि दँ लिपाया ख्वप दीर्घकालीन उद्देश्य जूगु खँ धयादिल ।

नगर उपप्रमुख रजनी जोशीं लसकुस यासें नेमकिपाया घोषणापत्रकथं हे नगरपालिकां देय् व जनताप्रति समर्पित जुयाः ज्या यानाच्वंगु चर्चा यानादिसे जनप्रतिनिधि व कर्मचारीया कुतलं हे नगरपालिकां सफलता प्राप्त यायेफुगु खः धयादिल ।

ज्याझ्वलय् ख्वप नगरपालिकाया प्रमुख प्रशासकीय अधिकृत कृष्ण गिरी, ख्वप जिल्लाया प्रमुख जिल्ला अधिकारी खगेन्द्रप्रसाद रिजाल, ९ का वडाध्यक्ष रविन्द्र ज्याख्व, भक्तपुर क्यान्सर अस्पतालया कार्यकारी निर्देशक विष्णुदत्त पौडेल, ख्वप ईन्जिनियरि· कलेजका प्रमचार्य सुजन माकः लगायतं नुगःखँ तयादीगु खः ।

सम्बन्धित बुखँ

LEAVE YOUR COMMENTS