ने. सं. ११४४ कौलाथ्व पारू - नःलास्वनेगु

ससफो १५ वडा कमिटीया अधिवेशन

येँ – संघीय समाजवादी फोरम (ससफो) नेपालया सहअध्यक्ष नापं प्रतिनिधिसभा सदस्य राजेन्द्र श्रेष्ठं नेपाःया कम्युनिष्ट पार्टीया नेतात वास्तविक कम्युनिष्ट मखुगु जिकिर यानादीगु दु । लिसें वय्कलं सत्ताय् थ्यनेवं जुजु महाराजा थेंज्याःगु व्यवहार याइपिं सच्चा कम्युनिष्ट जुइ मफइगु नं धयादीगु दु ।

ससफो येँ मनपा १५ वडा कमिटीया अधिवेशनया उलेज्या यासें वय्कलं उगु खँ धयादीगु खः । ज्याझ्वलय् नवासें मूपाहां श्रेष्ठं नेपालय् संघीय व्यवस्था वःसां नं प्रदेशतय्त अधिकार मबिउगुलिं जक मखसे केन्द्रया अधिकार तक नं प्रधानमन्त्रीं थः हे जक निहीत यानातःगु धासें सत्तारुढ नेपाल कम्युनिष्ट पार्टी (नेकपा)या आलोचना यानादिल ।

‘थ्व संघीयताया नामय् केन्द्रीकृत शासनया अभ्यास खः’ सांसद श्रेष्ठं धयादिल, ‘म्हिगः गरिबी व अभावय् जीवन हनाच्वंपिं कम्युनिष्ट पार्टीया नेतात थौं सत्ताय् थ्यनेवं जुजु महाराजा थेंज्याःगु व्यवहार यानाच्वंगु दु । उलि जक मखु न्हय्गू पुस्तयात गाक्क सम्पत्ति मुंकेगु ज्या यानाच्वंगु दु ।’

वय्कलं म्हिगः जुजु महाराजा गथे थिकेगु खाताय् द्यनीगु खः उकथंया आवश्यकता इमित नं माःगु, राष्ट्रपतियात १८ गू करोड वंगु गाडी छाय् आवश्यक जुल धइगु खँय् आक्रोश प्वंकादिसें न्हूपिं राजघरानाया जन्म जुयाच्वंगु द्वपं बियादिल ।

अधिवेशनय् विशिष्ट पाहांकथं झायादीम्ह पार्टीया केन्द्रीय दुजः नापं येँ महानगरया इन्चार्ज पवित्र वज्राचार्यं पार्टी संगठनयात सु्दृढ याना यंकेमाःगु खँय् बः बियादिसें पार्टीयात त्वाःत्वालय् विस्तार याना यंकेगु स्वयेमाः धयादिल ।

पार्टीया १५ वडा कमिटीया अध्यक्ष सुमन महर्जनया अध्यक्षताय् जूगु अधिवेशनय् जिल्ला कमिटीया दुजःपिं बिजीरत्न, अर्जुन श्रेष्ठ, राजाराम तण्डुकार, सुरज महर्जन, ओमरत्न ताम्राकार, महानगर अध्यक्ष मंगलरत्न ताम्राकारलिसें समाजवादी लोकतान्त्रिक ट्रेड युनियन महासंघया मिसा नेतृ सोनाम लामा शाक्यपिंसं न्हूगु ज्यासना पुचःयात भिंतुना देछासे थःथःगु विचाः तयादीगु खः ।

उगु अधिवेशनं महर्जनया हे अध्यक्षताय् २९ म्हेसिया न्हूगु वडा समितिया नं न्हूधाः याःगु खः ।