ने. सं. ११४६ बछलागा तृतीया -

जनबहाः द्यः मिसापिंसं सालीगु

येँ(नेपालभाषा टाइम्स)- थुगुसी जनबहाःया द्यःया खः मिसापिंसं सालीगु जूगु दु । जनबहाःया द्यःया खः सालीगु न्हापांगु दिंकुन्हु जमःनिसें असनय्तक मिसापिं जक जानाः द्यः सालेत्यंगु खः ।

सेतो मच्छिन्द्रनाथ रथजात्रा व्यवस्थापन समिति अन्तर्गत मिसा परिचालन उपसमितिया सक्रियताय् जनबहाः द्यःया जात्राया न्हापांगु न्हि जमःनिसें असनय् तक मिसापिंसं जक द्यः सालेगु तयारी याःगु खः ।

जनबहाः द्यःया जात्रा वइगु चौलाथ्व अष्टमि (चैत १५)निसें शुरु जू वनाच्वंगु दु । थ्वकुन्हु जमःनिसें असनय्तक द्यः सालीगु खःसा थुकी मुक्कं मिसापिं जक जानाः द्यः सालाः याः न्यायेकेगु क्वःछिउगु खः ।

लुमंकेबहजू, वंगु छुं दँ न्ह्यःनिसें येँयाःया इलय् दकलय् लिपांगु दिं नानीचा याःकुन्हु मिसापिं जक जानाः द्यः खः सालेगु याना वयाच्वंगु दु ।