ने. सं. ११४४ कौलाथ्व पारू - नःलास्वनेगु

कोथुननि बचे यायेत हस्ताक्षर संकलन

येँ – असनय् च्वंगु कोथुननिया छेँ थुनाः बिजनेस कम्प्लेक्स दयेकेत्यंगु विरोधय् म्हिगःनिसें हस्ताक्षर अभियान न्ह्याःगु दु । म्हिगः सुथय् ८ बजेनिसें न्ह्याःगु अभियान न्यान्हु तक न्ह्याइगु खँ धाःगु दु । ‘असन कोथुननी बचाउ अभियानं’ थ्व हस्ताक्षर संकलन अभियान न्ह्याकूगु खः ।

गुथि संस्थानं ऐतिहासिक कोथुननी थुनाः अन व्यापारिक भवन दयेकेगु सम्झौता याःगु विरोधय् स्थानीय जनता लिसें सम्पदाह्यःमि स्वनिगःया स्थानीय जनतां विरोध याना वयाच्वंगु दु ।

गुथि संस्थान अन्तर्गत दुगु उगु छेँय् झिंछगू परिवारं पसः तया वयाच्वंगु दुसा स्वंगू परिवार छेँय् च्वनेगु याना वयाच्वंगु दु । २०७० सालय् बाः पुलाच्वंगु ई तक उमि सन्तान दरसन्तानं भोगचलन याये दइ कथं संस्थानं अन च्वना वयाच्वंपिं लिसे सम्झौता याःगु खः । अशोक वृक्ष विहार नं धाइगु उगु छेँया छ्यलिइ अमिताभ बुद्धया मूर्ति दु ।

दँय्दसं पञ्चदानया छन्हु न्ह्यः होम यानाः भ्वय् नयेमाःगु चलन दुसा पञ्चदानया कुन्हु शाक्यमुनि वज्राचार्ययात भिक्षा बीगु परम्परा न्ह्याना वयाच्वंगु दु । स्थानीय वासिन्दां ऐतिहासिक महत्व दुगु उगु थासय् व्यापारिक भवन दयेके मजिउ धासें थीथी चरणया आन्दोलन याना वयाच्वंगु खः ।

हस्ताक्षर संकलन लिपा उगु हस्ताक्षर प्रधानमन्त्री केपी शर्मा ओलीयात लःल्हायेगु खँ कोथुननी बचाउ अभियानया संयोजक नमस्ते साय्मिं ‘नेपालभाषा टाइम्स’ यात कनादीगु दु ।