‘आदिपुरुष’ य् बालेन साह फय्गं साबित

येँ (नेपालभाषा टाइम्स)- भारतीय संकिपा ‘आदिपुरुष’ य् दुथ्यानाच्वंगु छगू संवाद फिल्मं मचीकूगु धासें येँ मनपा दुने हिन्दी फिल्म हे बन्द याःम्ह येँ मनपाया मेयर बालेन साह अन्ततः फय्गं साबित जूगु दु ।

वय्कलं उगु फिल्मया गुगु संवाद चीकेमाः धकाः माग यानादीगु खः, फिल्मय् अज्याःगु संवाद हे मदुगु खँ सार्वजनिक जूगु दु । बालेन साहं उगु फिल्मय् ‘सीता भारतय् जन्म जूगु’ धइगु छगू संवाद दुगु व उगु संवादं यानाः नेपाःया राष्ट्रियता हे खतराय् लाइ धासें उगु संवाद संशोधन मयाःतले येँ दुने हिन्दी फिल्म धइगु हे प्रदर्शन याके बी मखु धकाः घोषणा याःगु खः । हिन्दी पफिल्म क्यने मबीगु बालेनया उगु घोषणा विरुद्ध फिल्म वितरकत अदालत वनेगु तयारी समेत यानाच्वंगु दु ।

तर उगु फिल्म स्वयेधुंकूपिं नेपाःया पत्रकारतय्सं धाःसा फिल्मय् सीताया जन्मस्थल बारे अज्याःगु आपत्तिजनक छुं संवाद हे मदुगु खँ धाःगु दु । बालेन साहं थम्हं फिल्म हे मस्वसे कर्पिंसं धाःगु भरय् हिन्दी फिल्मयात प्रतिबन्ध तःगु खँ नं धयाहःगु दु ।

‘आदिपुरुष’ य् अज्याःगु दृश्य वा संवाद मदु धकाः खँ पिहां वःसां बालेन साहं आः तक थःपिनि प्रतिक्रिया धाःसा बिउगु मदुनि । बालेन साहं छगू ट्विट यायेवं नेपाःया मेमेगु नगरया मेयरपिंसं नं थ्वहे निर्णय कायान्वयन याना यंकूगु खः ।