संकेत वयेवं आइसोलेसनय् च्वनादिसँ !

येँ (नेपालभाषा टाइम्स)- स्वास्थ्य तथा जनसंख्या मन्त्रालयं कोरोना संक्रमणया लक्षण खने दयेवं आइसोलेसनय् च्वनेत इनाप याःगु दु । मन्त्रालयया सुचनय् धयातःगु दु, ‘उकुन्हु लखं प्याःगु, म्हिगः ख्वाउँगु नयागु व थौं धू दुथाय् वनागु धकाः त्वहः चिनादी मते, लक्षण खनेदयेवं परीक्षण याके नु आइसोलेसन च्वने नु ।’

मन्त्रालयं सेखं चाइगु व ज्वरो वइगु प्रमाणित मजूतले कोभिड–१९ जुइ फइ धासें सतर्क जुइत नं इनाप याःगु दु । नेपालय् न्हापांखुसी कोरोना भाइरसया न्हूगु भेरियन्ट ओमिक्रोन एक्सविवि. १.१६ खनेदुगु खँ नं मन्त्रालयं धाःगु दु ।

थौंकन्हय् जःलाखःला देय् भारतय् नं उगु हे न्हूगु भेरियन्टया कारणं संक्रमण अप्वयाच्वंगु धासें अप्वया वनाच्वंगु संक्रमण पनेत व नियन्त्रणया नितिं फुक्कं तह व तप्कां प्रभावकारी भूमिका म्हितेत नं मन्त्रालयं इनाप याःगु दु ।

कोभिड महामारी अझ नं पूर्ण रुपय् नियन्त्रणय् मवःगुलिं जनस्वास्थ्य सम्बन्धी मापदण्ड पालना यायेत व खोप कायेत नं मन्त्रालयं इनाप याःगु दु ।

शून्यय् कुहां वयेधुंकूगु कोरोना भाइरस संक्रमण नेपालय् आः हाकनं थहां वनाच्वंगु दु । वंगु चैत २० गते थुखे जक न्हू संक्रमण जूपिनिगु ल्याः २२७ म्ह थ्यंगु दु । भारतय् कारोना जूपिं अप्वयेवं नेपालय् नं खने दया वःगु खः ।

सम्बन्धित बुखँ

LEAVE YOUR COMMENTS