फेसबुक ग्वाहालिं द्वलंद्वःयात छात्रवृत्ति

येँ – फेसबुकपाखें आर्थिक संकलन यानाः गांया द्वलंद्वः मस्तय्त छात्रवृत्ति बियाः चर्चाय् वःम्ह मय्जु पूनम खड्गीं थुगुसी नं १५० निसें २०० म्ह मस्तय्त छात्रवृत्ति बियागु खँ कनादीगु दु । प्रेरक छात्रवृत्तिपाखें वय्कलं उगु ग्वाहालि याना वयाच्वंगु खः । थुगु दँया निंतिं ९५ म्हेसित छात्रवृत्ति बीत आर्थिक ग्वाहालि चूलायेधुंकूगु खँ कनादिसें थप दातापिंसं आर्थिक ग्वाहालि यायेगु निंतिं स्वापू तयाच्वंगु खँ वय्कलं नेपालभाषा टाइम्सयात कनादिल ।

सरकारी विद्यालय निःशुल्क धाःसां नं सामान्य आर्थिक हैसियत दुपिं विद्यार्थीतय्सं कोचिङ शुल्क, फारम शुल्क, परीक्षा शुल्क, अतिरिक्त क्रियाकलाप शुल्क, स्टेशनरी, पोशाकंनिसें थीथी सामान न्यायेत वय्कलं उगु छात्रवृत्ति बिया वयाच्वनादीगु खः ।

वय्कलं छात्रवृत्ति बियापिं विद्यार्थीतय्त प्यलाय् छकः अनुगमन यानाः उमिसं ब्वनाच्वंगु पाय्छि जू मजू सीकेगु व पढाई बांमलाःसा विद्यार्थी, अभिभावक व शिक्षकपिं तयाः माःगु सुझाव नं बीगु ज्या यानाच्वंगु दु । थ्वहे झ्वलय् वय्कःया कुतलं काभ्रेया श्री भुमेश्वर प्राइमरी स्कुल भवन व जनता प्राइमरी स्कुल धादिङया भवन दयेकेगु ज्या नं क्वचायेधुंकूगु दु ।

सम्बन्धित बुखँ

LEAVE YOUR COMMENTS