कर्मबन्धन त्वाःमदःतले पुनर्जन्म

जन्म नापं स्वाना वइगु मृत्यु । सुनां पनां पने मफइगु । लिछ्याये नं मफुगु । मचा, ल्याय्म्ह, ल्यासे, बुराबुरी छुं मधाइगु । आयु संस्कार क्वचायेवं वनेमाःगु मृत्यु । म्हाः धाये मदु । लिपा वने धाये मजिउ । सकसितं वइगु मृत्यु । तर मृत्यु लिपा गन वनी ? छु जुइ ? अझ धाये, मृत्यु लिपा हानं जन्म जुइ वा मजुइ ? जूसा गन जन्म जुइ ? छाय् जन्म जुइ ? थ्व नं धाये फइमखु । गन इलय् ब्यलय् बुखँ नं पिदं । मचां न्हापाया जन्मया खँ कन । वया छेँजःपिं म्हसीकल । थुकथं सञ्चार माध्यमय् पिदंगु छुं बुखँ स्वये । थ्व छगू भारतया घटना खः । रामपुरया न्यादँ दुम्ह मचा । वं थःगु वास्तविक छेँ थः जन्म जूगु छेँ स्वयाः १५ किलोमिटर तापाक जूगु खँ कन । वया कलाः नापं सन्तान नं दु । उलि जक मखु, वया कलाः सन्तानया नां तकं कन । वं थःयात गोलीं कयेकाः स्यागु नं न्ह्यथन । वया म्ह्य् गोलीया चिं नं दु । गुगु चिं न्यादँ दुम्ह मचायाके खंके फु ।

अथेहे बिहारया ७३ दँ दुम्ह जैन सित । व अतिकं तःमिम्ह । अनं लिपा व हिन्दू परिवारय् जन्म जुल । तर छगू गरिब परिवारय् । गरिब परिवारय् जूसां वया चहपह तःमि सरह । व मचां खँ हे मखंगु । नां तकं मन्यंगु सर सामान थःगु धाइगु । थः अतिकं सम्पन्न थें ब्यवहार याइगु । भारतय् जक मखु, अरबय् नं थुकथंया घटना जू । अन छम्ह मचां न्यँ तकं मन्यंगु, सुनां स्यना तकं मबिउगु पंजाबी भासं खँ ल्हात । नेपालय् नं थुकथंया घटनाया बुखँ पिदं । उकिं थुकिया विषय अध्ययन अनुसन्धान नं जुयाच्वंगु दु । सन् १९६० हे डा. इ सन् स्टेभेन्सनं थुकिया बारे अनुसन्धान न्ह्याकूगु खः । थौंया बैज्ञानिक युगय् मनूया म्हय् इनर्जि धइगु खँ प्रमाणित जुइधुंकल । मनू सीबलय् नं इनर्जि दइ । व इनर्जि धइगु शरीरय् वनी धका नं ब्याख्या याः । उकिं थौं पुनर्जन्मया बारे विश्वास याइपिं नं आपाः दया वयेधुंकल ।

बौद्ध साहित्यय् नं पुनर्जन्मया खँ न्ह्यथनातःगु दु । प्रत्येक समुत्पादय् कर्म बन्धन त्वाः मदःतले हानं हानं जन्म जुयां तुं च्वनी । मृत्यु लिपा नं कर्म संसारय् प्यपुना च्वनी धकाः न्ह्यथनातःगु दु ।

बौद्ध साहित्यय् नं पुनर्जन्मया खँ न्ह्यथनातःगु दु । प्रत्येक समुत्पादय् कर्म बन्धन त्वाः मदःतले हानं हानं जन्म जुयां तुं च्वनी । मृत्यु लिपा नं कर्म संसारय् प्यपुना च्वनी धकाः न्ह्यथनातःगु दु । थुगु खँयात प्रस्ट यायेत तथागतं कनाबिज्याःगु थुगु घटना स्वये । मांबौया याकः काय् । अतिकं गुणवान । बौम्ह मदयेका ला झन् मांया सेवा याइम्ह । छँेया ज्याखँ बुँया ज्या दक्वं थःम्हं याइम्ह । अतिकं ज्ञानीम्ह । काय्म्हेसिया बैस जुल । ब्याहा याये त्यल । मांम्ह ब्याहा यानाः बीत भौमचा स्वः जुल । तर काय्म्ह ब्याहा याये चाहे मजू । सदां मांया सेवा यानाः च्वने धया जुइ । थः मदयेवं काय्यात पासा दइमखु धकाः मांम्ह ग्यात । उकिं मांम्हेसियां कर यानाः काय्म्हेसित ब्याहा याना बिल ।

ब्याहा ला याना बिल । तर वपाखें सन्तान मन्त । समाजया विश्वास निःसन्तान जुलकि छेँ स्यनी । कुल बंश नाश जुइ । थ्वहे विश्वास मांम्हेसिनं नं यात । थ्व खँ वं थः काय्यात नं कन । मां व काय्या दथुइ जूगु सहलह भौम्हं ताल । थ्व खँ न्यनाः व ग्यात । वं बिचाः यात । मांम्हं लिथु हया बिल कि गज्याःम्ह लाइगु जुइ ? बरु जिं हे लिथु मालाः ब्याहा याना बीमालि । थथे यात कि लिथुं नं जितः बिश्वास याइ । जि हे मालिक्नी जुयाच्वने दइ । अनंलि वं थः भाःतया इहिपा यानाबिल । वपाखें सन्तान दइ धकाः न्ह्यथुम्ह तसकं ग्याः । उकिं वं थः लिथुयात थथे धाल, ‘जब छं प्वाथय् दइ, दक्कलय् न्हापां जितः धाः ।’ थःयात हे छेँय् हयाबिउम्ह न्ह्यथु । लिथुम्हं वया खँय् विश्वास यात । थः प्वाथय् दयेवं वं दक्कलय् न्हापां न्ह्यथुम्हेसित कन । न्ह्यथुम्हं वयात वासः नकल । वया मचा कुहां वल । निक्वःगु पालय् नं वया प्वाथय् दत । थ्व खँ नं कन । थुगु इलय् नं न्ह्यथुम्हं वासः नकल । न्ह्यथुं वासः नकूगु लिथुं छप्तिं वाः मचाः ।

छन्हु वया जःलाखःला लिथुम्ह नापाला वन । व नापं थःगु दुबिस्ताया खँ ब्याकल । थः निक्वः तक मचा कुहां वःगु खँ नं कन । थ्व खँ न्यनाः जलाःखलाःम्हं धाल, ‘थ्व पक्का नं छं न्ह्यथुया ज्या जुइफु ।’ थ्व खँ न्यनाः व झसंग जुल । वयां लिपा नं व प्वाथय् दत । तर थुगु इलय् वं न्ह्यथुम्हेसित छुं खँ मकं । ई वन । वया प्वाः तग्वः जुल । थ्व खनाः न्ह्यथुम्हं सीकल । थ्व इलय् नं न्ह्यथुम्हं मचा क्वथलेगु योजना दयेका च्वन । छन्हुं मचायेक वं वासः नकल । प्यला न्याला दये धुंकूगु वासः नयेवं लिथुम्ह वाथावाथा कन । मचा कुहां वये मफुत । थःयात न्ह्यथुं वासः नकूगु सीकल । थः जीवन मरणया दथुइ लात । थुगु इलय् वं प्रण यात, ‘जि थनं अवश्य सी । जि थनं सिना वंसां यक्षणी जुयाः जन्म जुइ दयेमाः । थ्वयां लिपा जिं छंम्ह मचा नये दयेमाः ।’

थुकथं तृष्णाय् दुबिनाः लिथुम्ह सित । थ्व खँ माजु व भाःतम्हेसिनं सीकल । उकिं उमिसं न्ह्यथुम्हेसित अतिकं दाल । वं दाःगु सह याये मफुत । व नं अन हे सित । थुकथं न्ह्यथु व लिथु निम्हं सिना वन । मृत्यु लिपा लिथुम्ह अन छेँय् भौचा जुयाः जन्म जुल । न्ह्यथुम्ह खाचा जुल । खां ख्येँ थ्वल । थ्व खनेवं भतिं नयाबिल । भतिं निक्वः तक खाया ख्येँ नयाबिल । थ्व खनाः भतिं लिपा थःगु मेगु जन्मय् भौ नापनापं वया मस्त नं नये दयेमाः धकाः प्रार्थना यात । थ्वयानं लिपा न्ह्यथुम्ह चितुवा जुल । लिथुम्ह मृगणी । चितुवां मृगणीया मस्त स्वक्वः तक नयाबिल । थुकिं यानाः थुमि दथुइ तृष्णा अप्वयां तुं च्वन । थ्ययां लिपाया जन्मय् छम्ह यक्षणीया कुलय् जन्म जुल । मेम्ह कुलपुत्री जुल । कुलपुत्रीया मचा बुल । थ्व खँ यक्षणीं नं सीकल । व मनूया भेषय् कुलपुत्रीयाथाय् वन । वं मचा नयाबिल । निक्वः तक यक्षणीनं कुलपत्रीया मचा नयाबिल । स्वक्वःखुसिया पालय् तथागतया शरणय् वन । थुकिं यानाः उमि दथुइया ल्वापु शान्त जुल । तृष्णा दमन जुल ।

थुकथं कर्मया प्रकृति व कर्मया कारणं हे प्राणीया जन्म जुइ । मरण नं जुइ । लिपा जन्म जूवनीगु वया तृष्णा कर्मया कारणं जुइ । थुगु जन्मय् धारण जूगु प्राणीया रूप मेगु जन्मय् मजुइ नं फु । थुगु खँ बुद्धकालीन प्रेत कथा दुनेया उबरिपेतबन्थु दुने तथागतं थथे धयाबिज्याःगु दु, ‘मिसा जुयाः जन्म काःम्ह मनू सदां मिसा हे जुइ धइगु मदु । मिजं नं जुइफु । पशु नं जुइफु । थ्व संसारया अन्त स्वये नं थुइके थाकु । थ्व आदि व अन्त्य खने मदुगु संसार । अविद्यां त्वपुया च्वंगुलिं तृष्णा व संयोजनय्
न्ह्यानाच्वंगु सत्वपिसं थुइके थाकु ।

अथेहे धम्मपदया तृष्णा वर्गय् नं धयातःगु दु, ‘तृष्णा रुपी खुसि मनूतय्त तसकं यइ । न्ह्यइपुसे च्वनी । सुखया कामना याइपिं मनूत तृष्णाया खुसिया लहरय् लानाः बारम्बार जन्म मरणया फन्दाय् लानाच्वनी ।

सम्बन्धित बुखँ

LEAVE YOUR COMMENTS