ने. सं. ११४६ अनलाथ्व पुन्हि -

बाबुराम भट्टराईया राजनीतिक भविष्य

नेपाःया न्हूगु संविधान जारी याःगु इलय् प्रधानमन्त्री जुयादीम्ह नेपाःया राजनीतिइ छम्ह खेलाडी कथं म्हस्यूम्ह डा. बाबुराम भट्टराई । नेपाःया जनयुद्धया इलंनिसें हे सकलसिनं म्हस्यूम्ह अले देशय् गणतन्त्रया निंतिं छगू महत्वपूर्ण भूमिका म्हितादीम्ह डा. बाबुराम भट्टराईया राजनीतिक भविष्य छु जुइगु खः धकाः नेपाःया राजनीतिइ चिउताःया विषय जुयाच्वंगु दु ।

२०७२ सालय् संविधानसभापाखें न्हूगु संविधान जारी जूगु इलय् आः गिलास बच्छि जाल अर्थात बागः जाल, आः पुरा जायेकेगु अर्थात छगलं जायेकेगु ल्यंदनि धकाः टिप्पणी यानादीगु खः । नेपाःया न्हूगु राजनीतिक परिस्थितिइ न्हूगु कथं न्ह्याः वनेमाः धकाः माओवादीपाखें ब्यागलं च्वना नयाँ शक्ति निर्माण यानादीगु खः । उगु इलय् वय्कःपाखे यक्व हे आकर्षित जुल । माओवादी पार्टी त्वःताः हे कयौं नेतात वन । अथे हे कलाकर, उद्यमीनिसें थीथी पक्षयापिं तकं उकी दुहां वन । नयाँ शक्ति धकाः न्हूगु पार्टी घोषणा याःगु इलय् छगू लखम्ह पार्टीया संस्थापक धकाः तकं घोषणा यात । उकिं नेपाःया राजनीतिइ छगू न्हूगु कथंया पार्टी जुइ अले धाथें हे न्हूगु शक्तिया रुपय् वैकल्पिक शक्तिया रुपय् बाबुरामया नेतृत्वया पार्टी स्थापित जुइ धकाः यक्वसिनं तायेकूगु खः ।

नयाँ शक्ति जब चुनावय् वन अबले बाबुराम भट्टराईया राजनीतिक हैसियत खनेदत । छगू लखम्ह संस्थापक सदस्य दुगु पार्टी नयाँ शक्ति नेपालया अबलय् मुक्कं भोट हे ८६ हजार जक वल । संस्थापक सदस्यत गुलि दु उलि हे भोट मवल । अथे जूसां डा. बाबुराम भट्टराई निरन्तर रुपं नयाँ शक्ति धकाः वन । अनं लिपा पार्टी त्वःताः वनीपिं नं अप्वया वल । व हे इलय् नयाँ शक्ति पार्टीं उपेन्द्र यादवया नेतृत्वय् दुगु संघीय समाजवादी फोरमलिसे एकता यात । अले मंकाः कथं समाजवादी पार्टी धकाः नां तल । अनं लिपा संघीय समाजवादी व राष्ट्रिय जनता पार्टीया दथुइ नं एकता जुल । एकता जुइ धुंकाः जनता समाजवादी पार्टी नेपाल नां जुल । थुगु ई तकया दुने डा. बाबुराम भट्टराई पार्टीया संघीय परिषद्या अध्यक्ष जुयादीगु खः । लिपा हाकनं जसपाय् वःपिं राजपाया नेतात पार्टी तछ्यानाः वन । थुकथं राजनीतिक घटनाक्रमय् निरन्तर न्ह्याः वनाच्वंम्ह डा. बाबुराम भट्टराई आःया अवस्थाय् थ्यंबलय् तक तसकं कमजोर अवस्थाय् थ्यंगु दु । जनता समाजवादी पार्टीया नायः उपेन्द्र यादवलिसे वय्कःया यक्व खँ मिले मजुल । व्यावहारिक रुपं असहमति जुया वःगु खनेदत । अले डा. बाबुराम भट्टराईनं हाकनं ब्यागलं पार्टी निर्माण यायेगु योजना दयेकल । ब्यागलं भेला यात । जनता समाजवादी पार्टीं वय्कःयात कारवाही यायेधुंकूगु दु । आः डा. बाबुराम भट्टराईया राजनीतिक भविष्यय् हे न्ह्यसः ब्वलनाच्वंगु दु ।

डा. बाबुराम भट्टराई समाजवादी पार्टीलिसे एकताय् वंगु इलय् गुलि नेता कार्यकर्ता ज्वनावंगु खः आः ब्यागलं च्वंगु इलय् उलि नं शक्ति मंत । तसकं कमजोर अवस्थाय् लात । उलि जक मखु थःगु पक्षय् दुपिं कयौं नेता कर्याकर्तात आः एमाले वा माओवादी केन्द्रय् वनेगु योजना दयेकाच्वंगु दु । बाबुराम भट्टराईलिसे दुपिं तःधंगु संख्याय् नेता कार्यकर्तात एमाले व माओवादी केन्द्रय् वनीगु अवस्था दु । अले ल्यंदुपिं मनूत च्वनाः न्हूगु पार्टी दयेकेगु खँ जुयाच्वंगु दु । उकी दुने नं लोकतान्त्रिक समाजवादी पार्टीइ वनेमाः धाइपिं यक्व दु । थुगु ल्याखं स्वल धाःसा डा. बाबुराम भट्टराई आः गुगु कथं न्ह्याःवनेगु धयागु सवालय् हे अलमलय् लानाच्वंगु खनेदु ।

नेपाःया मधेसीनिसें आदिवासी जनजातितय्गु पहिचानया मुद्दा, समावेशीता मुद्दा ज्वनाः बागः जाःगु गिलासयात जायेकेगु योजना सहित न्हूकथंया योजना दयेकाः वनेगु धकाः नयाँ शक्ति पार्टी निर्माण याःम्ह भट्टराई नं आः थः गलत थासय् लात धकाः स्वीकार यानादीगु दु । भिंगु व बांलाःगु ज्या याये धकाः वँवं हे गलत थासय् लात धकाः थः लिक्क लाःपिं नेता कार्यकर्तातय्त धायेगु यानाच्वंगु दु ।

वय्कलं नेपाःया फुक्क प्रमुख राजनीतिक दलतय्सं पहिचान, समावेशीता व समानुपातिकया मुद्दा धयागु राजनीतिक मुद्दा जक दयेका पूमवंकेगु कथंया यानाच्वंगु दु धकाः विश्लेषण यानादीगु दु । दक्व दलतय्सं आदिवासी जनजाति, मधेसीनिसें दलितया मुद्दा सम्वोधन याये धाइगु तर व्यवहारय् धाःसा सम्वोधन यायेगु पक्षय् मदु धकाः भट्टराई आः थुइकूगु खनेदु । जब कि नेपाःया प्रम्ुख दलया प्रमुख नेतातय्सं पहिचानया मुद्दानिसें समानुपातिक समावेशीताया मुद्दा धयागु आदिवासी जनजाति, मधेसीनिसें दलिततय्त तकं कन्फ्यूज यायेगु निंतिं जक ल्ह्वानाच्वंगु अले उमिगु नियत धाःसा सफा मजू धकाः नेपाःया आदिवासी जनजाति, मधेसी मुद्दायात लिक्क च्वना स्वयाच्वंपिं, विश्लेषण यानाच्वंपिं नापं आदिवासीवादया खँ ल्हाइपिं सकलसिनं न्हापांनिसें धया हे वयाच्वंगु खँ खः ।

आदिवासी जनजातिया पहिचानया खँ ल्हात धाःसा भौगोलिक पहिचान, खुसिया पहिचान, पहाडया पहिचान धकाः मंकाः पहिचानया नारा बियाः कन्फ्यूज याना वयाच्वंगु हे खः दलया नेतातय्सं । अथे हे पहिचानया आन्दोलन तच्वइगु इलय् अर्थात पहिचानया मुद्दा तच्वल धाःसा थःगु पार्टी दुनेयापिं आदिवासी जनजाति, मधेसी दलिततय्त न्ह्यःने तया उग्र रुपं प्रस्तुत याकाः ब्यागलं कथंया संरचना दयेकेगु निंतिं तकं दलतय्सं लिफः मस्वः । थ्व खँ थुइकेत तापाक वना स्वः वने हे म्वाः । संविधानसभाया चुनावया इलंनिसेंया घटनायात जक स्वल धाःसां बांलाक हे थुइ ।

डा. भट्टराईया राजनीतिक भविष्य आः छगू कथं संकटय् लाःगु जकं मखुला धयागु न्ह्यसः ब्वनावःगु दु । भट्टराई ला प्रधानमन्त्री तकं जुइधुंकल । तर वया ल्यूल्यू वनाच्वंपिं ला कन्हय् वनाः छुं दइ ला धकाः आशा यानाच्वंगु दु नि । उकिं बाबुराम भट्टराईयात यक्व ई तक मेमेपिं कार्यकर्तातय्सं साथ बिइगु अवस्था मदु । नेपाःया राजनीतिइ शक्ति दुगु पार्टी जक न्ह्यःने लाइगु, सत्ताय् वनेफुगु पार्टी जक ल्यना च्वनीगु अवस्था दु । मेमेगु पार्टी धाःसा न्ह्यःने वयेफइगु अवस्था आः थथेंया निंतिं खने हे मदु । आः जुइगु चुनावया लिच्वः नं प्रमुख दलत मध्ये छगू १ नम्बरय् लाइगु मेगु २ नम्बरय् अले मेगु ३ नम्बरय् लाइगु बाहेक मेगु जुइगु वाला छुं मदु । थौंया इलय् मनूत थः सुरक्षित जुइगु निंतिं अले कन्हय् वनाः साथ कायेगु निंतिं हे प्रमुख पार्टीया ल्यूल्यू जुइगु खः । सामान्य मनूतय्गु निंतिं दल बिनाया थःगु

जनजीवननिसें छुं नं कथंया ज्या यायेगु सम्भावना मदु धकाः तायेकेत बाध्य जुयाच्वंगु अवस्था दु । उकिं धात्थें हे देशय् हिउपाः आःया अवस्थाय् वइगु खनेमदु । छुं ई अझ नं मालीगु अवस्था दु धाःसां छुं पाइमखु ।