आः निजामति सेवाय् खस आर्ययात नं आरक्षण
येँ- संसदया राज्य व्यवस्था समितिं निजामति सेवाय् प्रवेश जुइत छुटे यानातःगु आरक्षणय् आः खस आर्य समुदाययात नं दुथ्याकीगु खँय् सहमति कायम याःगु दु । थ्व समुदाययात नं दुथ्याकाः विधेयकय् संशोधन यायेगु लागिं सामान्य प्रशासन मन्त्रालयं छवाःया ई काःगु दु । निजामति सेवाय् तुलनात्मक रुपं खस ब्राम्हण समुदाययापिं जक अप्वः जुयाः आदिवासी जनजाति, मधेसी, दलित आदि समुदाय कम जुल धकाः लिउने लाकातःगु थ्व समुदायया लागिं आरक्षणया व्यवस्था याःगु खः । तर थुकी खस आर्य समुदायं नं आरक्षण माग याना हयेवं उमित नं दुथ्याकेगु तयारी शुरु जूगु खः ।
थौंकन्हय् निजामति सेवाय् खुल्लापाखे ५५ प्रतिशत व थीथी समुदाययात आरक्षणपाखे ४५ प्रतिशत व्यवस्था यानातःगु दु । आः खस आर्य समुदाययात नं आरक्षण बीगु खःसा ४५ प्रतिशतया कोटा बढे यानाः खुल्लापाखेया ५५ प्रतिशतयात घटे यायेमाःगु खँ न्ह्यःने वःगु दु ।
राज्य व्यवस्था समितिया बैठकय् न्ववाःपिं खस आर्य समुदायया सांसदतय्सं ‘खस आर्य’ या नां हे संविधानय् उल्लेख यानातःगु जुयाः थ्व समुदाययात नं आरक्षण बीमाःगु माग याःगु खः ।
खस आर्य धकाः ब्राम्हण, क्षेत्री, ठकुरी, दशनामी व सन्यासी जातियात कयातःगु दु । थौंकन्हय् निजामति सेवाय् ब्राम्हण व क्षेत्री जातिया हे आधिपत्य दु ।
थ्व समुदाययात नं आरक्षण बीगु खःसा आः आरक्षण व खुल्लाया प्रतिशत गय् यानाः व्यवस्था यायेगु धकाः विवाद पिहां वःगु दु । थ्वहे विवाद समाधान यायेगु लागिं सामान्य प्रशासन मन्त्रालयं छवाःया ई काःगु खः ।
बैठकय् न्ववाःपिं छुं सांसदतय्सं आः खुल्ला व आरक्षणया प्रतिशत ५०–५० हे तयेमाली धकाः प्रस्ताव याःगु खःसा गुलिसिनं धाःसा खुल्ला ३० प्रतिशत जक तयाः आरक्षणयात ४० प्रतिशत यायेमाःगु माग याःगु खः । थौंकन्हय् निजामति सेवाय् मिसा ३३, आदिवासी जनजाति २४, मधेसी २०, दलित ९, थारु ४, मुस्लिम ३, पिछडिएको वर्ग ४ व अपांगता दुपिंत ३ प्रतिशत थाय् बीगु कथं आरक्षणया व्यवस्था यानातःगु दु । थुकी खस आर्य समुदाय नं दुथ्याकेगु जुल धाःसा मेगु करिब २५ प्रतिशत कोटा थपे यायेमाःगु जुइ ।
सामान्य प्रशासन मन्त्रालयं आः वइगु छवाःया दुने आरक्षणया न्हूगु कोटा व्यवस्था मिले यानाः विधेयक तयार यायेगु धकाः जिम्मा कया वंगु खँ धाःगु दु ।
LEAVE YOUR COMMENTS