खटे मजुइपिं कर्मचारीयात कारवाही

येँ – प्रदेशय् खटे याःपिं कर्मचारीत इलय् वना मबिउगु कारणं प्रदेश सरकारया ज्या फुक्क भद्रगोल जूगु दु । कर्मचारी मवयाः ज्या मजूगु आलोचना वयेवं सरकारं खटे जूपिं कर्मचारीतय्त रमाना मबीपिं हाकीम व रमाना मकाइपिं कर्मचारीतय्त कारवाही यायेगु धकाः ख्याच्वः बीवं आः रमाना काइपिं कर्मचारीत अप्वया वःगु खँ धाःगु दु ।

आः तकया दुने ६० प्रतिशत कर्मचारीत थःत खटे याःगु थासय् थ्यनेधुंकूगु खँ संघीय सरकारं धाःगु दु । तर प्रदेशतय्सं धाःसा कर्मचारीत अझ नं थ्यंकः मवःनिगु खँ धाःगु दु । थीथी प्रदेशपाखें यक्व आलोचना वयेवं प्रधानमन्त्री केपी ओलीं कर्मचारीत माक्व खटे याना हये धकाः प्रतिवद्धता समेत प्वंकादीगु दु ।

थःगु प्रदेशय् कर्मचारीत मवल धकाः २ नम्बर प्रदेशया मुख्यमन्त्री लालबाबु राउतं प्यन्हु न्ह्यः प्रम ओलीयात लिखित पौ हे च्वयाः छ्वया हःगु खः । तर मुख्यमन्त्रीं च्वया हःगु उगु पौ म्हिगः तक नं प्रधानमन्त्रीया ल्हातय् मथ्यंनिगु खँ धाःगु दु ।

मन्त्रालयया विभाग गुलि ?
सरकारं फुक्क प्रदेशय् मन्त्रालयत कम जक तयेगु धकाः ला निर्णय यात तर अज्याःगु प्रत्येक मन्त्रालय अन्तर्गत विभागत ग्वःगू दइ धइगु खँ धाःसा आः तक निर्णय याये मफुनि । मन्त्रालय घटे याः थें मन्त्रालय अन्तर्गतया विभाग नं घटे यायेमाःगु खः । तर छु छु विभाग तयेगु धइगु खँ धाःसा आः तक निर्णय याये मफुनि ।
विभागया निर्णय जुइ मफयाः आः सरकारं बजेट गय् यानाः दयेकेगु धकाः नं निर्णय याये मफयाच्वंगु खँ धाःगु दु । प्रदेश सरकारया निर्माण लिपा अप्वः बजेट दयेके मालीगु जुयाः आः आर्थिक संकलनया लागिं राजश्वया न्हून्हूगु श्रोत चूलाकेगु ज्या नं यायेमाःगु आवश्यक जुयाच्वंगु खँ धाःगु दु ।