भिक्षु प्रज्ञानन्दया ११८ क्वःगु बुदिं हन

येँ- ङत तुलाधर, समितिपाखें नेपाःया न्हापांम्ह संघ महानायक भिक्षु प्रज्ञानन्द महास्थविरया ११८ क्वःगु बुदिं हन । समितिया थःगु हे भवनय् जूगु ज्याझ्वलय् धर्मकीर्ति विहारपाखें बिज्याःपिं दानवती गुरुमां व त्यागवती गुरुमांपिंसं परित्राण पाठ याना बिज्याःगु खः । ज्याझ्वलय् समितिया न्वकु संसारधर तुलाधरं मदुम्ह श्रद्धेय भिक्षु प्रज्ञानन्द महास्थविरया म्हसीका बियादीगु खः ।

ने।सं। १०२० बछलाथ्व तृतिया कुन्हु तुलाधर किलागः कवःया कायमचाकथं थनया इतुम्बहालय् जन्म जुयादीम्ह कुलमान सिंह तुलाधरजु लिपा वनाः थेरवाद बुद्ध शासय् भिक्षु प्रज्ञानन्द महास्थविरया नामं सकसिनं म्हसिउम्ह खः । वसपोलं थेरवाद बुद्ध शासनय् नेपालय् बौद्ध जागरण हयेगु ज्याय् ज्वःमदुगु योगदान बियाबिज्याःगु दु । कर्मशील भन्ते, तःधिकःम्ह भन्त, संघ महानायक भन्ते आदि नामं नं म्हसीम्ह वसपोल लिसें च्याम्ह भिक्षुपिंत वि।सं। २००० सालय् क्रुर राणाशासनकालय् देशं पितिउँगु खः ।

‘बुद्ध शिक्षा व नेपालभाषाया प्रचार यायेगु त्वःतेमखु, बरु देशं पिहां वनेत तयार’ धकाः राणातय् न्ह्यःने पुलिं चुइगु पलेसा शान्तिपूर्ण क्रान्ति न्ह्याका बिज्याःम्ह वसपोल लिपा देय् प्रजातन्त्र वये धुंकाः नेपाः लिहां बिज्याःगु खः । नेपाः लिहां बिज्याये धुंकाः नं वसपोलं मदिक्क हे थेरवाद बुद्ध शिक्षा प्रचार प्रसार यायेगु ज्यायात निरन्तरता बियाबिज्याःगु खः ।
नेपाल संवत् १११३ य् बुद्ध शिक्षाया प्रचार प्रसार याना बिज्याना च्वँच्वं हे ९३ दँया बैंशय् वसपोल दिवंगत जुयाबिज्याःगु खः ।

सम्बन्धित बुखँ

LEAVE YOUR COMMENTS