ने. सं. ११४३ चौलाथ्व तृतीया -

गुगल ट्रान्सलेसनय् गुद्वःत्या स्वयां अप्वः खँपु मुन

येँ – नेवाः भासं न्ववाःगु खँ थःथम्हं अंग्रेजीं अनुवाद जुइगु प्रणाली विकास यायेत थौंकन्हय् जुयाच्वंगु कुतः अतिकं सकारात्मक ढंगं न्ह्याः वनाच्वंगु खँ थुकी संलग्न विज्ञतय्सं धाःगु दु । थ्व ज्या न्ह्याकेत थौंकन्हय् झिद्वः खँपु (वाक्य) मुंकेगु ताः तयाः ज्या न्ह्यानाच्वंगु खःसा मुक्कं निलाया दुने ९,६०० गू वाक्य मुनेधुंकूगु दु । आः मेगु ४०० गू खँपु नं याकनं हे मुने सिधइगु आशा जुयाच्वंगु दु ।

नेपालभाषा टाइम्सया ‘अमेरिकाय् नेवाः’ खँल्हाबल्हा ज्याझ्वलय् ब्वति कासें थुगु गुगल ट्रान्सलेशन ज्याझ्वःया प्राविधिक विज्ञपिं उज्वल राजभण्डारी, दिपेश शाक्य व संयुक्त श्रेष्ठपिंसं थ्व खँ धयादीगु खः ।

थ्व ज्याया लागिं खँपु मुंकेत वंगु निला न्ह्यवंनिसें नेपालभाषा ख्यःया थीथी मनूतय्सं न्हिंन्हिं बहनी मुनाः मंकाः कथं ज्या यानाच्वंगु दु । ज्याया ग्वसाः गुगलपाखें याःगु खःसां उकियात ताःलाकेगु लागिं समुदाय हे जानाच्वंगु कारणं याकनं लक्ष्य पूवनेत्यंगु खँ गुगलया इन्जिनीयर उज्वल राजभण्डारीं कनादिल ।

अथे हे मेम्ह विज्ञ दिपेश शाक्यं आः नेपालभाषायात म्वाका तयेगु खःसा इन्टरनेटय् थुकिया पहुँच मदयेकुसें मगाः धासें थ्व ज्यापाखें नेपालभाषायात परन्तु तक ल्यंकेगु ज्या याइ धयादिल ।

थ्व परियोजना सफल जुल धाःसा कन्हय् वनाः थवंथवय् भाः मथूपिं निम्ह मनूतय् दथुइ नं याउँक खँल्हाबल्हा याये फइगु खँ धाःगु दु । अमेरिकाय् च्वंम्ह नेवाः भाय् मसःम्ह छय्नं अंग्रेजीं न्ववाःसां नेपालय् च्वंम्ह अंग्रेजी मथूम्ह अजिं नेवाः भासं हे उकियात ग्रहण यानाच्वंगु दइ । भाय् मथुइ धकाः संवाद त्वाःथले माःगु आवश्यक मजुइगु खँ राजभण्डारीं कनादिल ।

उकथं हे भाषिक अभियन्ता संयुक्त श्रेष्ठं थ्व ज्या ताःलात धाःसा कन्हय् वनाः नेवाः भासं दयेका तःगु फिल्म स्वयेबलय् स्वतः हे अंग्रेजी सवटाइटल वइगु व उकी अलग्ग सवटाइटल तयाच्वने म्वाःलीगु खँ कनादिल ।

नेपालभाषाय् छगू हे खँग्वःया तःगू मछि अर्थ दइगु (गथे कि ‘वा’) कारणं गुगलं उकियात गय् यानाः सही अर्थ पिकयाः अनुवाद याइ ले धइगु न्ह्यसः पिहां वयाच्वंगु खँ कँसें श्रेष्ठं थ्व समस्या समाधान यायेगु लागिं गुगलय् फयांफछि अप्वः डाटा इन्ट्री यायेमाःगु व गुलि अप्वः डाटा इन्ट्री उलि हे अप्वः थ्वं ‘करेक्ट’ उच्चारण याइगु जूगुलिं झीसं उकी नं ज्या यायेमाःगु खँ कनादिल ।
आः याकनं हे थःपिंसं यानाच्वनागु ज्याया बारे जानकारी बीत्यनागु खँ वय्कःपिंसं कनादीगु दु ।