कौशी थिएटरय् पचली भैरव

येँ – येँ देय्यात रक्षा याना वयाच्वंम्ह भैलः द्यः पचली भैरव गुकथं टेकुया पचलिइ सिद्ध जुल धयागु बारे झीसं बाखं न्यना वयाच्वनागु दु । व हे बाखंयात आः दृश्य मार्फत स्वये नं खंगु दु । पचली भैरवया बाखंयात दृश्य मार्फत स्वयेखंका बीगु दु नांजाःम्ह चर्या गुरु चन्द्रमान मुनिकारं ।

भाजु मुनिकारया निर्देशनय् थौंकन्हय् येँया टेकुस्थित कौशी थिएटरय् सांस्कृतिक नाटक पचली भैरवया क्यनेज्या जुयाच्वंगु दु । नाटकय् पचली भैरव व नैं अजिमाया मतिनाया बाखं लिसें फम्पी व भोटया जुजु धाइम्ह पचली भैरव गुकथं सिद्ध जुल धयागु बाखं लिसें पचली भैरव मतिनाय् तक्यं नैं अजिमाया प्रेम, त्याग, बलिदानया बाखं स्वये दइ ।

वंगु कार्तिक २५ गते निसें क्यनेज्या सुरु जूगु थुगु नाटक कन्हय् शनिवाः तक थिएटरय् क्यनेज्या जुइ । चर्या गुरु मुनिकारया बाखं, परिकल्पना व निर्देशन थुगु थुगु नाटकया नाट्य रुपान्तरण व सह निर्देशन इँगिहोपो कोइच सुनुवारं याःगु दु । प्याखनय् सुदनमान मुनिकारं पचली भैरवया भूमिकाय् म्हितातःगु दुसा श्रृष्टिना मुनिकार, अनिसा श्रेष्ठ, नानुमैंया महर्जन, संगीता थापा, पवित्रा राई, सृजना शर्मा, युवहाङ राई, रोशनी चौधरी, करिना सुनुवार व इगिंहोपो कोइच सुनुवारं थीथी भूमिका म्हितातःगु दु ।

थौंकन्हय् अप्वः थें नाटक चर्चित विदेशी नाटकया नेपाली रुपान्तर यानाः दयेका वयाच्वंगु अवस्थाय् थःम्हं नेपाःया हे मौलिक , ऐतिहासिक बाखंया अधारय् नाटक न्ह्यब्वयागु खँ निर्देशक मुनिकारं धयादीगु दु ।

सम्बन्धित बुखँ

LEAVE YOUR COMMENTS