ने. सं. ११४४ ञलाथ्व नवमी -

नेवाः पत्रकार राष्ट्रिय दबूया न्हूपिं पदाधिकारीतय्त यलय् भिंतुना देछात

यल – नेवाः पत्रकार राष्ट्रिय दबूया न्हूपिं पदाधिकारी व यल कचाया पदाधिकारीपिंत बौद्ध विहार संघ व लाय्कू नेवाः ज्याझ्वः पुचःपाखें भिंतुना देछाःगु दु । बिहिवाः अक्षयेश्वर महाविहारय् छगू ज्याझ्वः यासें नवनिर्वाचित पदाधिकारीपिंत ख्यें सगं बियाः भिंतुना देछाःगु दु ।

ज्याझ्वलय् न्ववानादिसें बौद्ध विहार संघया नायः नानीकाजी शाक्यं नेवाःत छप्पँ यानातयेगु निंतिं नेवाः संचारकःमिपिंसं भूमिका म्हितीगु खँय् विश्वास प्वंकादीगु दु ।

वंगु स्वन्ति नखःबलय् येँ, यलय् म्हपुजा यायेगु खँय् जूगु गडबडीं यानाः नेवाःत छप्पँ मजू धइगु सन्देश वंगु खँ कनादिसेंवय्कलं वइगु स्वन्तिबलय् नं तिथिइ गडबडी दुगुलिं आः हे थुकिया बारे सहलह ब्याकेगु निंतिं संघपाखें छगू गोष्ठी यायेत्यनागु खँ नं कनादिल । ज्याझ्वलय् नाइस टेलिभिजनपाखें प्रशारण जुइत्यंगु नेवाः ज्याझ्वः ‘झीगु सः’या नं घोषणा जूगु खः ।

थ्व ज्याझ्वः मंसिर २० गते निसें हरेक शुक्रवाः ६ः३० ताः इलय् प्रशारण जुइगु जानकारी ज्याझ्वःया कजि विजयरत्न असंबरें कनादिल । ज्याझ्वलय् नाइस टेलिभिजनया सिइओ आर्शिवाद पुनं थःपिनि टेलिभिजनय् मेमेगु नेवाः ज्याझ्वः नं तयायंकेगु खँ धयादीगु खः ।

भिंतुना ज्याझ्वलय् विहार संघया निर्वतमान नायः पुष्परत्न शाक्य, वरिष्ठ उपाध्यक्ष करुणारत्न वज्राचार्य, अक्षयेश्वर महाविहार संघया अध्यक्ष राजेश शाक्यपिंसं भिंतुना देछायादीगु खः । अथेहे दबूया नायः सुरजवीर वज्राचार्य, महासचिव सुनिल महर्जन व यल कचाया न्वकु प्रशान्त मालीपिंसं नुगःखँ तयादीगु खः ।