समाजवादी ३ नं. प्रदेश पार्टी समायोजन

यल – तत्कालीन संघीय समाजवादी पार्टी व नयाँ शक्ति पार्टी, नेपालया ३ नं. प्रदेशस्तरीय समितिया समायोजन जूगु दु । समायोजनकथं निगू पार्टीया एकीकरण लिपा गठन जूगु समाजवादी पार्टी ३ नं. प्रदेश समितिइ सोनाम सिंह स्याङतानयात अध्यक्षय् ल्यःगु दु । वय्कःया अध्यक्षताय् ग्वीगुम्ह दुजः दुगु ३ नं. प्रदेश समिति गठन याःगु खः ।

न्हू गठन जूगु समाजवादी ३ नं प्रदेश समितिइ मोहन बराइली महासचिव जुयादीगु दु । थुकथं हे पार्टीया नेवाः राष्ट्रिय (प्रदेश) समितिइ मनरत्न शाक्ययात नायः ल्यःगु दु । समितिइ सुशीला शाक्य, शोभा वज्राचार्य, जनक थापायात न्वकुकथं ल्यःगु दुसा परिवर्तन भट्टराई महासचिव, श्रीराम खाइजु सचिव, गीता सिख्राकारयात कोषाध्यक्षकथं ल्यःगु दु ।

नेवाः प्रदेश समिति ख्वीन्याम्हेसिया खः । अथे हे निगू पार्टीया दथुइ जूगु समायोजनकथं ताम्सालिङ राष्ट्रिय (प्रदेश) समितिइ कृष्णकुमार घलान, शेर्पालुङ राष्ट्रिय (प्रदेश) समितिइ दावा छिरि शेर्पा, शिल्पी राष्ट्रिय समितिइ दलमर्दन कामीया नेतृत्वय् न्हूगु समिति गठन याःगु दु । थुकथं हे सत्यनारायण डंगोलया नेतृत्वय् समाजवादी नेवाः संघ, जय गोलेया नेतृत्वय् समाजवादी ताम्सालिङ संघया नं गठन याःगु दु ।

थनया महालक्ष्मीथानय् च्वंगु किरात याक्थुम चुम्लुङया ज्याकुथिइ जूगु समायोजन ज्याझ्वलय् मूपाहां पार्टीया संघीय परिषद्या नायःलिसें पुलांम्ह प्रधानमन्त्री बाबुराम भट्टराई, वरिष्ठ नेता अशोक राई, सहअध्यक्ष राजेन्द्र श्रेष्ठ लगायतं संबोधन यानादीगु खः ।