ने. सं. ११४६ दिल्लाथ्व पारू -

युएस–बांगला विरुद्ध नेपालय् मुद्दा

येँ – नेपाःया त्रिभुवन अन्तर्राष्ट्रिय विमानस्थलय् सन् २०१८ या मार्च १२ कुन्हु दुर्घटना जूगु युएस–बांगला विमानसेवाया विरुद्ध उगु हे दुर्घटनाय् लानाः मदुपिं नेपाःमितय् छेँजःपिंसं मुद्दा दायर याःगु दु । उमिसं येँया जिल्ला अदालतय् थ्व मुद्दा तःगु दु ।

उगु विमान दुघर्टनाय् लानाः मदुपिं न्हय्म्ह नेपाःमिपिनि छेँजःपिंसं वायुयान कम्पनी विरुद्ध २ अर्ब १० करोड तका क्षतिपूर्ति बीमाःगु दाबी यासें थ्व मुद्दा दर्ता याःगु खः । विमान दुर्घटना जूगु झिंखुला बीधुंकाः नं कम्पनीपाखें अन्तर्राष्ट्रिय कानून कथं माग दावी याःगु क्षतिपूर्ति बीत अस्वीकार याःगुलिं बाध्य जुयाः पीडिततय्सं अदालतय् मुद्दा दर्ता याःगु खँ धाःगु दु ।

उगु दुर्घटनाय् बंगलादेशय् एमबीबीएस ब्वनाः लिहां वःपिं नेपाःमि विद्यार्थीत एन्जिला श्रेष्ठ, आसना शाक्य, मिली महर्जन, निगा महर्जन, प्रिन्सी धामी, सञ्जय महर्जन व श्रेया झा सीगु खःसा आः मुद्दा नं उमिगु हे छेँजःपिंसं दायर याःगु खः । म्हिगः युएस–बांगला विमान दुर्घटनाय् लानाः सीपिं न्हय्म्ह यात्रुया छेँजःपिंपाखें विदुरमान श्रेष्ठं रिट दायर याःगु खँ उमिसं छगू प्रेस विज्ञप्ति जारी यासें धाःगु दु ।

बंगलादेशया ढाकां येँय् वयाच्वंगु युएस बांगला एयरलाइन्स येँया त्रिभुवन अन्तर्राष्ट्रिय विमानस्थलय् दुर्घटना जूगु खःसा उकी लानाः न्यय्छम्ह यात्रु सीगु व नीम्ह घाःपाः जूगु खः ।

उगु दुर्घटनायात कयाः नेपाल सरकारपाखें नीस्वंगु जाँचबुझ आयोगया प्रतिवेदनय् पाइलटया कमजोरी जूगु खँ न्ह्यथनातःगु दुसा विमान कम्पनीं धाःसा त्रिभुवन अन्तर्राष्ट्रिय विमानस्थलया ट्राफिक कन्ट्रोल रुमया कारणं विमान दुर्घटना जूगु खः धायेगु यानाच्वंगु दु । दुर्घटना जूगु उगु विमानय् सुइस्वम्ह नेपाःमि, सुइनिम्ह बंगलादेशी, छम्ह चिनियाँ व छम्ह माल्दिभ्सया यात्रु दुगु खःसा मेपिं फुक्कं चालक दलया दुजःत खः ।