प्रधानन्यायाधीशया ज्याझ्वः बहिष्कार

येँ- प्रधानन्यायाधीश चोलेन्द्र जबरा सहभागी जूगु ज्याझ्वः वरिष्ठ अधिवक्तातय्सं बहिष्कार याःगु दु । म्हिगः सर्वोच्च अदालत बार एसोसिएसनया चियापान ज्याझ्वः वरिष्ठ अधिवक्तातय्सं बहिष्कार याःगु खः । मोहनि नखःया लसताय् म्हिगः सर्वोच्च बारं चियापान ज्याझ्वः तयातःगु खःसा उगु ज्याझ्वलय् प्रधानन्यायाधीश जबरायात मूपाहां कथं ब्वनातःगु खः ।

मन्त्रिपरिषद्य् भागबन्डा फ्वंगु लगायत थीथी खँया विवादय् लानाच्वंम्ह प्रधानन्यायाधीशया ज्यायात कयाः न्ह्यसः दनाच्वंगु कारणं वय्कःयात मूपाहां कथं सःतातःगु ज्याझ्वःयात वरिष्ठ कानुन व्यवसायीतय्सं बहिष्कार याःगु ।

वरिष्ठ अधिवक्तातय्सं थःपिसं संगठित रुपय् मखुसें स्वविवेक छ्यलाः चियापान ज्याझ्वलय् मवनागु खँ धाःगु दु । वरिष्ठ अधिवक्तातय्सं विरोध यायेमाःगु सर्वोच्च बारं प्रधानन्यायाधीशया समर्थन याःगु थें खने दइगु जूगुलिं सांकेतिक रुपय् थःपिसं ब्वति मकयागु खँ धाःगु दु ।

वरिष्ठ अधिवक्तातय्सं चियापान ज्याझ्वः बहिष्कार याइगु न्हापां हे सुचं वयेधुंकाः प्रधानन्यायाधीश जबरा नं चियापान ज्याझ्वलय् मवंगु खः । वय्कलं स्वास्थ्यया कारण क्यनाः ज्याझ्वलय् मवंगु खः । चियापान ज्याझ्वलय् सर्वोच्च अदालतया मेपिं न्यायाधीशपिं धाःसा उपस्थित जूगु दु । न्यायाधीशपिं सपना मल्ल प्रधान, हरि फुयाल, मनोज शर्मा व नहकुल सुवेदीपिं धाःसा ज्याझ्वलय् वंगु खः ।