हेटौंडा – पुलांम्ह सांसद व परराष्ट्रविद् हिरण्यलाल श्रेष्ठयात हेटौंडाय् वय्कःया ज्याजंक्वया लसताय् रथारोहणसहित विशेष सम्मान याःगु दु । नेवाः सांस्कृतिक पुचः मकवानपुरया ग्वसालय् जूगु ज्याझ्वलय् वय्कःयात रथय् तयाः हेटौंडा नगर चाःहीकूगु खः । नगर चाःहीके धुंकाः जूगु ज्याझ्वलय् मूपाहां प्रदेश नं. ३ या सभामुख सानुकुमार श्रेष्ठं वय्कःयात हनापौ लःल्हानादीगु खः ।
भाजु श्रेष्ठं मकवानपुरय् नेपालभाषा विकासया निंतिं तःधंगु योगदान यानादीगु खँ कनादिल । वय्कः सांसद जुयाच्वंगु हे इलय् वय्कःया हे कुतलय् स्वनिगलं पिने पिहां वइगु न्हापांगु पत्रिका कथं ‘हेटौंडा वाःपौ’ पिथनेगु सुरु जूगु खःसा वय्कलं मकवानपुरया नेवाःतय्त संगठित यायेगु निंतिं नं तःधंगु योगदान यानादीगु दु ।
ज्याझ्वलय् प्रदेश सभा सदस्य जुनेली श्रेष्ठ लिसें मकवानपुरया थीथी नेवाः संघसंस्थातय्सं वय्कःया योगदानयात कदर यासें हनापौ नं लःल्हाःगु खः ।
LEAVE YOUR COMMENTS