वासः यायेत विदेश वनीगुली जूगु राजनीति

सन् २००७ स पाकिस्तानय् संकटकाल घोषणा यानाः संविधान निलम्बन याःगु खँय् पुलांम्ह राष्ट्रपति व सैन्य नेता परवेज मुशर्रफयात देशद्रोहया मुद्दा तयातःगु खः । तर वासः याकेगु नामय् संयुक्त अरब इमिरेट्सया दुबई वंम्ह मुशर्रफ सन् २०१६ निसें अन हे तुं थात, आःतक लिहाँ वःगु मखु ।

स्वदेश लिहाँ वयेगु खँय् मुशर्रफं स्वास्थ्य व सुरक्षाया कारण क्यनाच्वंगु दु । खतुं वंगु मार्चय् जक मुशर्रफ दुबईया अस्पतालय् भर्ना जूगु बुखँ नं पिहाँ वल । थ्व हुनिं यानाः देशद्रोह याःम्ह मनू सजाय फयेम्वायेक विदेश वनाः याउँक च्वनीगु धइगु खँ पाकिस्तानया राजनीतिया छगू तःधंगु मुद्दा जुयाच्वंगु दु ।

अथे जुयाः प्रधानमन्त्री इमरान खानं नं आः उकथंया ज्या जुइमखु, देसय् दुने मुद्दा दुम्ह मनू सुयातं विदेश वनेगु अनुमति बीमखु धकाः जनतायात आश्वस्त नं यानातःगु दु । थ्व हे इलय् पाकिस्तानया पूर्व प्रधानमन्त्री नवाज शरीफ नं तच्वकं विरामी जुयाः विदेशय् वासः याकः वनेमाःगु जुल । तर मुशर्रफया केस स्वयाः वयात नं पित छ्वयेगु खँ मजुल ।

वयात नं पाकिस्तानय् भ्रष्टाचारया मुद्दा जुयाः जेलय् कुनातःगु खः । विरामी जूगु हुनिं अदालतया आदेशं खुवाः तकया नितिं धरौटीइ छुटे जुयावःम्ह खः । शरीफया नां एयरपोर्टय् हे नो फ्लाइट धलखय् तयातःबलय् पिहाँ वनेमखन । थ्वयांलिउ शरीफया पार्टी मुस्लिम लिग व प्रधानमन्त्री इमरान खानया सत्तारुढ पार्टी तहरिक ए इन्फाफया दथुइ वाक्युद्ध व राजनीतिक युद्ध न. तच्वत ।

थथे जूबलय् सरकारं वयात ७ अरब पाकिस्तानी तका बराबरया सम्पत्ति जमानत तयाः जक पिहाँ वनेफइगु यानाः निर्णय न्यंकल । थथे जूबलय् शरीफया किजा हे सरकारया विरुद्ध कुहाँ वयाः छुं गथे जुयाः शरीफयात च्वय्क्वय् जुल धाःसा प्रधानमन्त्री इमरान खान व वया सरकार हे जिम्मेवार जुइ धकाः पत्रकार सम्मेलन यानाः धाल ।

मेखे थुगु आदेशया विरुद्ध लाहौरया उच्च अदालतय् रीट तल । अदालतं नवाज शरीफयात स्वास्थ्य उपचारया नितिं प्यवाःतक विदेशय् वनेगु अनुमति बिसें वया नां नो फ्लाइट धलखं चीकेत सरकारयात उजं बिल । थ्वयांलिउ वंगु मंगलवाः शरीफ बेलायतया राजधानी लन्दनय् वनाः अनया अस्पतालय् वासः याकाच्वंगु दु ।

सीदुकथं वयात हिइ प्यालेटस् म्हो जुइगु लिसें मेगु थीथी ल्वय् जुयाच्वंगु दु । थुगु हे सालय् तिनि वयात भ्रष्टाचारया आरोप प्रमाणित जुयाः गुदँया कैद सजाय जूगु खः । नेतातसें थःगु शासनकालय् सत्ताया दुरुपयोग यानाः यायेजिक्व याइगु अले थःगु देय् त्वःता विदेशय् याउँक च्वंवनीगु सवाल पाकिस्तानय् जक मखु, मेमेथाय्या सवाल नं खः ।

नवाज शरीफ लिमथ्यन धाःसा थुकिया दबाब प्रधानमन्त्री इमरान खानयात नं लाइ । खतुं सरकारं अनुमति बियाः मखसें लाहौर उच्च अदालतं आदेश बियाः पिहाँ वंगु खःसां राजनीतिक दबाब लाइगु स्वाभाविक खः । तर वसिकं नं नवाज शरीफ धइम्ह व्यक्ति जक मखुसें मुस्लिम लिग पार्टीया नेता नं जूगुलिं पार्टीयात नं बांमलाक्क धक्का लाइ ।

मुशर्रफं नं ल्यं दनिगु कैद सजाय मफयेत अथे याइगु खःला धइगु आशंका मुशर्रफया सवालं पिदनीगु स्वाभाविक खः । उकिं सरकारं मानवीय आधारय् धकाः पित छ्वत धाःसा जनताया नजरय् सरकार हे पंगू ठहर जुइ । थुकिं प्रधानमन्त्री जुयाच्वंम्ह मनूया राजनीति नापं डाँवाडोल जुइ । हानं पित मछ्वयेसें तयेबलय् छुं जुयाः च्वय्क्वय् जुल धायेवं विपक्षी दलं देय् न्यंक हे मि च्याकी ।

ततःधंगु आन्दोलन यानाः सत्ता पलट याये नं फु । पाकिस्तान थुज्वःगु जियाउल हक व परवेज मुशर्रफ धइपिं सैनिकत हे शासक जुइ धुंकूगु व सेनां कू याइगु इतिहास दुगु देसय् लोकतन्त्र ल्यंकातयेगु नं छगू तःधंगु हे हाथ्या खः । उकिं विपक्षीतय्त तच्वःगु आन्दोलन नं न्ह्याकेबीगु अवस्था मदु । पाकिस्तानया प्रधानमन्त्री इमरान खानयात थुकथंया हे धर्मसंकट पिहाँ वल ।

आः ला नवाज शरीफ लन्डनया गाइज हस्पितल नांयागु छगू निजी अस्पतालय् जाँच याकादीगु दु । तर थ्व जाँचया गुगु रिपोर्ट पिदन, उकियात पत्याः याये बहः मजू धकाः प्रधानमन्त्री इमरान खानं धयादीगु दु । अर्थात् अस्पतालया रिपोर्टया बः कयाः नवाज शरीफ लिहाँ मवयेगु कुतः यायेफु धइगु आशंका दु ।

इतिहासय् सत्ता पलटया घटनालिपा जुजु वा नेता विदेशया शरणय् वनेमाःगु आपालं घटना मदुगु मखु । इरानय् इस्लामिक क्रान्तिलिपा शाह रेजा पह्लवी विदेशय् च्वनेगु खँय् नं आपालं समस्या जुल । खतुं व न्हापां इजिप्ट वंगु खः । अनया राष्ट्रपति अनवर अल सादातं वयात बांलाक्क हे सत्कार याना तःगु नं खः ।

अनंलि व मोरोक्कोया जुजु हसन द्वितीयया पाहाँ जुयाः नं च्वन । अनं तर मोरोक्कोया जुजुया निजी स्वार्थ खनेदयेधुंकाः शाह मोरोक्को त्वःताः बहामाजय् च्वं वन । लिपा अन विरामी जूबलय् अमेरिकाय् वासः याकः वनेमाल । तर जिम्मी कार्टरं दुकायेत मस्वः । लिपा थीथी क्षेत्रं दबाव बनेधुंकाः वासः यायेत दुकाल ।

अनंलि मेक्सिको वनाः च्वनेत स्वःबलय् दुमकाः । अले पनामाय् वनाः च्वन । तर शाहयात दुकागुली अनया जनतां आन्दोलन यात । अन्ततः तसकं स्वास्थ्य अवस्था स्यंगु अवस्थाय् इजिप्टय् तुं वनाः सित । अथे हे फिलिपिन्सया फर्डिनान्ड मार्कोस अमेरिकाया हवाई टापूइ निर्वासित जुइमाःगु खः ।

अफगानिस्तानया जुजु जहिर शाह धाःसा इटालीइ वासः याकाच्वंगु इलय् दाउद खानं सत्ता पलट याःगु खः । व थःगु देय् लिहाँ वयेमफुत । अथे हे मनू नइम्ह शासक कथं कुख्यात युगान्डाया दादा इदी अमिन साउदी अरेबियाय् निर्वासित जूगु खः । थुपिं जुजु वा शासक निर्वासित मजूगु खःसा थःगु देसय् दुने छु गति जुइ धाये थाकु ।

थ्व स्वयाः ला पाकिस्तानय् ला सिभिलियन सरकारं हे मुद्दा न्ह्याकूगु खः । अथे खःसा शासक जुयाच्वने धुंकूपिन्त सजाय फयाच्वनेगु थाकुगु खँ जुयाच्वन । मुशर्रफ ला अथें हे विसे वन धाःसा लोकतान्त्रिक सरकारया स्वक्वःतक नेतृत्व यायेधुंकूम्ह नवाज शरीफया नियत नं छु खः धायेथाकु । खतुं न्हापा अबु धाबी वनाः लिहाँ वःगु इलय् हे सरयात ज्वंगु खः ।

थुकथं विदेश वनाः लिहाँ वःगु अवस्थाय् ज्वंगु जूगुलिं नं आः विदेशय् थ्यने धुंकाः मुशर्रफ लिहाँ वइगु खँय् आशंका जूगु खः ।्नवाज शरीफ लिमथ्यन धाःसा थुकिया दबाब प्रधानमन्त्री इमरान खानयात नं लाइ । खतुं सरकारं अनुमति बियाः मखसें लाहौर उच्च अदालतं आदेश बियाः पिहाँ वंगु खःसां राजनीतिक दबाब लाइगु स्वाभाविक खः ।

तर वसिकं नं नवाज शरीफ धइम्ह व्यक्ति जक मखुसें मुस्लिम लिग पार्टीया नेता नं जूगुलिं पार्टीयात नं बांमलाक्क धक्का लाइ । नेता वासः याकेत पिहाँ वंगु व लिहाँ वइ मवइ धइगु खँय् राजनीति जूगु नं हलिंया इतिहासय् छगू न्ह्यथने बहःगु राजनीति जुयाच्वंगु दु ।

सम्बन्धित बुखँ

LEAVE YOUR COMMENTS