समाजवादीपाखें सरकार मत्वःतीगु

येँ – प्रधानमन्त्री केपी शर्मा ओलीं निक्वःखुसी यानादीगु मन्त्रिमण्डल पुनर्गठन लिपा तम्वःगु समाजवादी पार्टीं सरकार त्वःतीगु चर्चा जूसां आः तत्काल धाःसा सरकार त्वःतीगु सम्भावना मदुगु खँ धाःगु दु । म्हिगः समाजवादी पार्टीया केन्द्रीय बैठकं सरकार त्वःतेगु निर्णय याइगु आशा याःगु खःसां उगु खँ सत्य मजूगु दावी पार्टीया सहअध्यक्ष राजेन्द्र श्रेष्ठं ‘नेपालभाषा टाइम्स’यात यानादीगु दु ।

तत्कालीन उपप्रधान लिसें स्वास्थ्य मन्त्री जुयादीम्ह पार्टी अध्यक्ष उपेन्द्र यादव विदेश वनाच्वंगु इलय् प्रम ओलीं सरकार पुनर्गठन याःबलय् वय्कःया मन्त्रालय हिलाः कानुन मन्त्रालय छ्वया बिउगु खः ।

पार्टीलिसे सहलह तकं मयासे मन्त्रिमण्डल पुनर्गठन याःगु व मन्त्रालय हेरफेर यायेगु लिसें न्हापा पार्टीयात बिया वयाच्वंगु राज्यमन्त्रीया छगू सिट तकं मबिउगु धासें पार्टी दुने सरकार त्वःतेमाःगु दबाब वयाच्वंगु खः । उकथं हे केन्द्रीय समितिया बैठकय् नं पार्टी लिसे सहलह मयाःगु धासें सरकार त्वःतेमाःगु दबाब वयाच्वंगु खः ।

तर अध्यक्ष यादवं धाःसा सरकार त्वःतेगु स्वयां न्ह्यः सरकार लिसे संविधान संशोधनयात कयाः वार्ता यायेगु व संविधान संशोधनया सवालय् सरकारं लिचिल धाःसा सरकार त्वःतेगु खँ धायेगु याना वयाच्वंगु खः । थ्वहे झ्वलय् सीदु कथं समाजवादी पार्टीं याकनं हे संविधान संशोधनया निंतिं वार्ता यायेगु तयारी यानाच्वंगु दु ।