येँ मनपा मेयर शाक्ययात विशेष हना

येँ – ÷येँ महानगरपालिकाया मेयर विद्यासुन्दर शाक्ययात छगू ज्याझ्वःया दथुइ विशेष हनेज्या याःगु दु । नेवाः स्यनामि दबू, नेपालमण्डलया ग्वसालय् वंगु शुक्रवाः जूगु ज्याझ्वः दबूया मूदुजः मदनसेन वज्राचार्यया सभापतित्वय् जूगु खः । येँ महानगरपालिका सम्पदा विभागया प्रमुख अर्चना शाक्य श्रेष्ठ विशेष पाहांकथं झायादीगु ज्याझ्वलय् येँ महानगरपालिकाया वडा नं. २२ या वडाअध्यक्ष चिनिकाजी महर्जन, नेवाः अर्गनाइजेसन अफ जापानया कजि सुनिलकुमार शाक्य पाहांकथं झायादीगु खः ।

दबूया दांभरिं कायबहादुर नेपालीं लसकुस यानादिसें थीथी सामुदायिक ब्वनेकुथिइ न्ह्यानाच्वंगु नेपालभाषा कक्षा संचालन बारे जानकारी बियादीगु खः । येँ महागरपालिकाया आर्थिक ग्वाहालिं संचालन जुयाच्वंगु नेपालभाषा कक्षायात अझ तिबः बियाः न्ह्यःने यंकेगु निंतिं आर्थिक ग्वाहालिइ वृद्धि यायेत नं वय्कलं माग यानादिल ।

ज्याझ्वलय् नवासें येँ मनपा २२ वडाअध्यक्ष महर्जनं नेवाः स्यनामि दबुलिं थीथी सामुदायिक ब्वनेकुथिइ नेपालभाषा ब्वंकेत न्ह्याकाच्वंगु अभियान भाषा संरक्षणय् छगू धिसिलाःगु पलाः खः धासें दबूयात थम्हं नं फक्व ग्वाहालि यायेगु प्रतिवद्धता प्वंकादिल ।

अथे हे नेवाः अर्गनाइजेसन अफ जापानया कजि शाक्यं नेवाः स्यनामि दबुलिं नेपालभाषा कक्षा संचालन यानाः भाषा संरक्षण्या निंतिं यानाच्वंगु ज्या अतिकं च्वछायेबहजू धासें थःपिंसं ग्लोबल नेवाः नेटवर्कपाखें नं आर्थिक संकलन यानाः नेवाः मचा सिरपाः स्वनेधुंगु जानकारी बियादिल ।

नापं वय्कलं नेवाःत आर्थिक व राजनीतिक रुपं नं सक्षम जुइमाः धासें नेवाः स्यनामिया निंतिं दरबन्दीया व्यवस्था जुल धाःसा ब्वनीपिं नं अप्वयेके फइगु विश्वास प्वंकादिल । अथे हे याकनं हे नेवाः सुपरस्टार घोषणा यायेगु तयारी जुयाच्वंगु नं वय्कलं जानकारी बियादिल ।

पाहांपिंत नेवाः परम्पराकथं ख्यें सगं बियाः न्ह्याकूगु ज्याझ्वलय् दबूया लिउ छ्यांजे नन्दकाजी श्रेष्ठं सुभाय् देछानादीगु खःसा महाँकाली मावि, सरस्वति मावि व नवयुग माविया गैर नेवाः मस्तय्सं म्येँ व हुलाप्याखं न्ह्यब्वःगु खः ।

सम्बन्धित बुखँ

LEAVE YOUR COMMENTS