लिभरपुलया दबाब, म्याड्रिडया उत्कृष्ट प्रर्दशन
प्रिमियर लिगय् लिभरपुल बर्नलीयात बुकाः उपाधिया धेंधेंबल्लाः यानाच्वंगु म्यानचेस्टर सिटीयात दबाब बिउगु दु । कासाया खुगू मिनेटय् हे छगू गोलं लिउने लाःगु लिभरपुलं बर्नलीयात ४—२ गोलं बुकूगु खः । लिभरपुलया घरेलु मैदान एन्फिल्डय् जूगु कासाय् न्हापागुं हाफय् स्वगूं व निगुगूं हाफय् निगू गोल जूगु खः।
बर्नली विरुद्ध साडियो माने व रोबर्टो फिर्मिनों निगू निगू गोल यात । अथेहे बर्नलीया निंतिं एस्ले वेष्टवुड व बर्ग गुडमुनसनं छगू छगू गोल याःगु खः । कासाया खुगू मिनेटय् बर्नलीया वेष्टवुडं प्रहार याःगु कर्नर किक गोल जूगु खःसां लिभरपुलं १३ मिनेट दुने बराबरी गोल यात । कासाया १९ औं मिनेटय् मोहम्मद सालाहया क्रसय् फिर्मिनों गोल याःगु खः ।
न्हापागुं हाफया २९ औं मिनेटय् मानें गोल यानाः लिभरपुल अग्रता बिल । निगूगु हाफया ६८ औं मिनेटय् फिर्मिनाें व्यतिmगत निगूगु गोल यात । अथेहे इन्जुरी ईया ९१ औं मिनेटय् बर्नलीया गुडमुनसनं गोल यानाः कासा ३–२ या अन्तरय् हःगु खः, तर निगू मिनेट लिपा हे मानें मेगु गोल यायेवं बर्नलीं ४–२ गोलं पराजय फयेमाल ।
थ्व विजय लिपा लिभरपुल शीर्ष थासय् लानाच्वगुं म्यानचेस्टर सिटीं सिबे छगू अकं जक लिउने दु ।मेगु कासाय् म्यानचेष्टर युनाइटेड आर्सनल नाप २–० गोलं पराजित जुल । आर्सनलया निंतिं न्हापांगु हाफया १२ औं मिनेटय् ग्रानेट जाका व निगूगु हाफय् पेनाल्टी पाखें ६९औ मिनेटय् एमरिकं गोल याःगु खः ।
प्र्रिमियर लिगय् जोसे माउरिन्हो बर्खास्त लिपा ओल गुनार सोल्सकेएरं प्रशिक्षकया जिम्मा कायेधुंकाः युनाइटेड न्हापांखुसी पराजित जूगु खः । आर्सनल लिगया प्यंगूगु व युनाइटेड न्यागूगु थासय् दु । स्वंगूगुु थासय् लानाच्वंगु टोटनह्याम सिबें आर्सनल छगू अकं जक लिउने दु । अथेहे मेगु कासाय् लिगया खुगूगु थासय् लानाच्वंगु चेल्सीं वुल्भस नाप छगू छगू गोलया बराबरी म्हितल ।
उखे स्पेनिस ला लिगाय् रियल म्याड्रिडं रियल भालाडोलिडयात बुकूगु दु । खराब प्रर्दशन यानाच्वंगु म्याड्रिडं म्हिगः उत्कृष्ट कासा म्हिताः भालाडोलिडयात ४—१ गोलं बुकूगु खः । न्हापागुं हाफया २९ औं मिनेटय् मोहमेदया गोलं भालाडोलिडं अग्रता काःगु खःसां न्यागू मिनेट लिपा हे रफाएल भरानं बराबरी गोल यात ।
न्हापांगु हाफ बराबरी जूगु कासाया निगूगु हाफय् म्याड्रिडं स्वंगू गोल यात । थुकी बेन्जिमां ५१ औं मिनेटय् पेनाल्टी व ५९ औं मिनेटय् हेड यानाः निगू गोल याःगु खः । कासाया ८५औं मिनेटय् मोड्रिकं थप छगू गोल यात । कासाया ८० औ मिनेटय् कसमिरो निगू म्हासु कार्ड नयाः मैदान त्वःतेमागु खः । थ्व विजय लिपा नं रियल म्याड्रिड शीर्ष थासय् च्वंगु बार्सिलोना सिबें १२ अंकं लिउने दु ।
मेखे म्हिगः विजय चूलाकूसां म्याड्रिडया प्रशिक्षक सान्टियागो सोलारीया भविष्य छु जुइ धायेफुगु मदुनि । म्याड्रिड बार्सिलोनानाप कोपा डे रेया सेमिफाइनलय् ३–० गोलं, ला लिगाय् १–० व च्यापियन्स लिगय् अयाक्सनाप ४—१ गोलं पराजित जुइवं सोलारीयात संकट वःगु खः । रियल म्याड्रिड २२ दँ लिपा च्याम्पियन्स लिगया क्वाटर्रफाइनलं हे पिने लाःवनेधुंकूगु दु ।
LEAVE YOUR COMMENTS