उत्तराखण्डया मुख्यमन्त्रीं न्ववानाहल

येँ – नेपाःया लिम्पियाधुरा व लिपुलेक बारे विवाद जुयाच्वंगु इलय् भारतया उत्तराखण्ड प्रान्तया मुख्यमन्त्री त्रिवेन्द्रसिंह रावतं कालापानी भारतया हे खः दावी याना हःगु दु । भारतया छगू पत्रिकाय् अन्तर्वार्ता बिसें वय्कलं थ्व दावी यानादीगु खः ।

मुख्यमन्त्री रावतं नेपालय् कालापानी लगायत भूभागयात कयाः जुयाच्वंगु विरोध प्रदर्शनयात भारतं चिन्ताजनक रुपं स्वयाच्वंगु दु धासें धयादीगु दु, ‘नेपालं भारतया उगु भूमियात थुकथं विरोध यायेगु तरिका पाय्छि मजुल । थ्व नेपाःमिया संस्कृति नं मखु ।’ नेपाः व भारत जःलाखःला जूगुलिं वार्ताया माध्यमं समस्या ज्यंकेमाःगु खँय् नं वय्कलं बः बियादीगु दु ।

थ्व स्वयां न्ह्यः भारत सरकारं नं कालापानीइ नेपाःया सीमा क्वत्यःगु मदु धकाः दावी याना वयाच्वंगु खः ।वंगु कार्तिक २१ गते न्हू दिल्लीइ जूगु पत्रकार सम्मेलनय् न्ववासें भारतीय विदेश मन्त्रालयया प्रवक्ता रविश कुमारं न्हूगु नक्साय् नेपाःया सीमा महिउगु दावी याःगु खः । वय्कलं धयादीगु दु, ‘जिमिसं थःगु देय्या न्हूगु नक्सा पाय्छि कथं दयेकागु दु ।

जिमिसं जिमिगु हे भारतया सार्वभौम भूमि कःघानागु दु ।’ छुं न्हि न्ह्यः प्रधानमन्त्री केपी शर्मा ओलीं नेपाःया अतिक्रमित भूमि कालापानी, लिम्पियाधुरा व लिपुलेकतय् तयातःपिं भारतीय सुरक्षाकर्मी लित यंकेत भारतयात इनाप यानादीगु खः ।

सम्बन्धित बुखँ

LEAVE YOUR COMMENTS