यात्रु अप्वयाः हवाइ उडानय् कीर्तिमान !
येँ (नेपालभाषा टाइम्स)-खुसिबाः व चलखं सतक यातायात अवरुद्ध जुइवं हवाइ भाडा थकाःगु खँय् विरोध जुयाच्वंसां हवाइ जहाजपाखें यात्रा याइपिं यात्रुतय् ल्याः धाःसा अप्वयां तुं च्वंगु दु । हवाइ यात्रा याइपिं यात्रुत अप्वःगुलिं येँया त्रिभुवन अन्तर्राष्ट्रिय विमानस्थलय् म्हिगः हवाइ उडानया कीर्तिमान समेत कायम जूगु दु ।
त्रिभुवन अन्तर्राष्ट्रिय विमानस्थलय् म्हिगः छन्हुं हे न्यासःत्या स्वयां अप्वः उडान जुयाः न्हूगु कीर्तमान कायम जूगु खः । आन्तरिक उडान व अन्तर्राष्ट्रिय उडान यानाः म्हिगः छन्हुं हे ५५९ गू उडान जूगु खँ विमानस्थलया प्रवक्ता रिञ्जी शेर्पां कनादीगु दु । आन्तरिकपाखे हेलिकप्टरसहित २२७ उडान (डिपार्चर) व २२१ अवतरण (अराइभल) जूगु खः ।
अन्तर्राष्ट्रियपाखे नं ५६ अवतरण व ५५ उडान जूगु दु । प्रवक्ता शेर्पाया कथं थ्व छन्हुं जूगु सम्भवतः आः तकया हे सर्वाधिक उडान जुइमाः ।
विमानं ब्वइपिं यात्रुत अप्वयाः थौंकन्हय् त्रिभुवन विमानस्थलय् तसकं भीड जुयाच्वंगु दु । यात्रुत च्वनां च्वनेथाय् मदयेक भीड जूगुलिं विशेष यानाः विदेशी पर्यटकतय्त असुविधा जुयाच्वंगु खँ धाःगु दु ।
थ्वहे झ्वलय् निजी कम्पनीतय्सं हवाइ भाडा थकाःगु खँय् प्यखेरं विरोध याना हःगु दु । म्हिगः अखिलया विद्यार्थीतय्सं पर्यटन मन्त्री बद्रीप्रसाद पाण्डेयात नापलानाः भाः क्वकायेगु लागिं ज्ञापनपौ बिउगु खः । थज्याःगु विपतया इलय् जनतायात थप मार लाकी कथं थहां वंगु भाः नियन्त्रण यायेगु लागिं सरकारं पलाः ल्ह्वनेमाःगु माग ज्ञापनय् यानातःगु दु ।
थनया निजी हवाइ कम्पनीतय्सं भाः थकाःगुलिं येँनं न्हू दिल्लीया भाः स्वयां धनगढीया भाः अप्वः जुल धकाः सामाजिक सञ्जालय् चर्चा जुयाच्वंगु दु ।
LEAVE YOUR COMMENTS