कमलपुखू पुनःनिर्माणया निंतिं बोलपत्र आह्वान

येँ – येँ महानगरपालिकां कमलपुखू पुनःनिर्माणया निंतिं बोलपत्र आह्वान याःगु दु । येँ मनपाया प्रवक्ता ईश्वरमान डंगोलं पुखू पुनःनिर्माणया निंतिं बोलपत्र आह्वान यायेगु प्रक्रियाय् वने धुंकूगु जानकारी बियादीगु दु । येँ मनपां याःगु पत्रकार सम्मेलनय् प्रवक्ता डंगोलं उकिया जानकारी बियादीगु खः ।

पत्रकार सम्मेलनय् बिउगु जानकारीकथं स्वनिगःया सतकय् च्वंगु धू सफा यायेगु निंतिं हयेत्यंगु न्हूगु ब्रुमर थ्व हे वइगु फागुनया दुने थ्यंकः वइगु जूगु दु । येँ मनपां उगु ब्रुमर इटालीं हयेत्यंगु खः ।प्रवक्ता ईश्वरमान डंगोलं पत्रकार सम्मेलनय् १२ गू करोड लागतय् उगु ब्रुमर हयेत्यनागु जानकारी बियादिसें स्वनिगःया सतकय् च्वंगु धू सफा यायेत हयेत्यंगु ब्रमुर फागुन तकया दुने थन थ्यंकः वइगु जानकारी बियादीगु खः ।

आः हयेत्यंगु ब्रुमर बाहेकं येँ मनपायाके मेगु स्वंगः ब्रुमर दु । उकी मध्ये थौंकन्हय् छगः जक छ्यलाबुलाय् वयाच्वंगु दुसा मेगु निगः धाःसा मर्मत यायेमाःगु अवस्था दु । अथे हे मनोहरा खुसिया जःखः जग्गा एकीकरण अन्तर्गत खुसिया जःखः पःखालं ग्वयेगु नापं उगु थासय् तयातःगु न्यागू दर्जन स्वयां अप्वः ग्यारेजयात चिइकेत नं निर्देशन बी धुंगु प्रवक्ता डंगोलं पत्रकार सम्मेलनय् जानकारी बियादिल ।

थुकथं हे येँ मनपां चालु आर्थिक दँय् हे दक्वं वडा ज्याकूया थःगु हे वडा भवन दयेकेगु योजनाकथं वडा नं. ४, ८, ९ व १४ वडा भवनया ज्याकू निर्माणया निंतिं खरिद प्रक्रियाय् वने धुंगु नं वय्कलं जानकारी बियादिल । येँ मनपां चालु आर्थिक दँय् दक्वं वडायात थःगु हे वडा भवन दयेकेत २५ गू करोड विनियोजन याःगु खः ।

थ्व ल्याखं वडा नं. ६ व ७ या भवन निर्माणाधीन अवस्थाय् दुसा वडा नं. १८ व २६ या भवन दयेकेत वंगु छुं दिं न्ह्यः जक शिलान्यास यायेगु ज्या जूगु खः । थ्व हे झ्वलय् येँया धर्मपथय् च्वंगु येँ मनपाया स्वामित्वय् दुगु जग्गाय् पार्किङ स्थल दयेकेत नं बोलपत्र आह्वान यानागु व आशयपत्र नं वयेगु क्रम जारी जुयाच्वंगु दु ।

धर्मपथ बाहेकं थनया दरवार मार्गय् नं ‘स्मार्ट पार्किङ’ निर्माण यायेग योजना येँ मनपाया दु । थुकथं हे ‘मेयर उज्यालो कार्यक्रम’ अन्तर्गत महानगर लागाया दक्वं वडाया सतकय् च्याद्वः स्वयां अप्वः मत जडान यायेमाःगु आवश्यकताकथं आतकया दुने ६५० मत जडान यायेगु ज्या क्वचाये धुंकूगु दु ।