संघनायक भिक्षु ज्ञानपूर्णिक महास्थविरया धम्म मुदित अभिनन्दन
येँ – अखिल नेपाल भिक्षु महासंघ संघनायक अभिनन्द समारोह समितिं अग्गमहापण्डित, शासनधज धम्माचरिय, नेपाःया न्हय्म्हम्ह संघनायक भिक्षु ज्ञानपूर्णिक महास्थविरया धम्म मुदित अभिनन्दन याःगु दु ।
भिक्षु महासंघया नायः भिक्षु मैत्री महास्थविरया सभापतित्वय् जूगु ज्याझ्वलय् मूपाहांकथं उपराष्ट्रपति नन्दकिशोर पुनयात ब्वनातःगु खःसां स्वास्थ्यया कारणं वय्कः उपस्थिति जुइ मफयेवं पुलांम्ह प्रधानमन्त्री झलनाथ खनाल व संस्कृति, पर्यटन तथा नागरिक उड्डयन मन्त्री योगेशकुमार भट्टराईया प्रमुख आतिथ्यताय् उगु ज्याझ्वः जूगु खः ।
ज्याझ्वःया प्रमुख व्यक्तित्व संघनायक भिक्षु ज्ञानपूर्णिक महास्थाविरपाखें पंचशील प्रार्थनालिसें न्ह्याःगु ज्याझ्वलय् भिक्षु महासंघया उपाध्यक्ष भिक्षु धम्ममूर्ति महास्थविरं लसकुस याना बिज्याःगु खः ।
मूपाहां पुलांम्ह प्रधानमन्त्री खनालं बुद्धमूर्तिया न्ह्यःने देवाय् मत च्याकाः ज्याझ्वःया उलेज्या यानादीगु खःसा बुद्ध धर्मया स्वंगू यान थेरवाद, महायान व वज्रयानपाखें मंगल स्वस्ति वाचन जूगु उगु ज्याझ्वलय् नेपाःया निंतिं श्रीलंका, थाइल्याण्ड व म्यानमारया राजदूतपिंसं नं वसपोल भन्तेयात भिंतुना देछासे धर्मोपहार नं लःल्हाःगु खः ।
उगु इलय् संघनायक भिक्षु ज्ञानपूर्णिक महास्थविरं संघउपनायक भिक्षु बोधिसेन महास्थविरयात अभिनन्दन पत्र लःल्हाना बिज्याःगु खःसा भिक्षु ज्ञानपूर्णिक महास्थविरयात मूपाहां पूर्व प्रधानमन्त्री खनाल व मन्त्री भट्टराईं अभिनन्दन पत्र लःल्हानादीगु खः । उगु इलय् सछि व नीछगू थीथी विहार व बौद्ध संघसंस्थापाखें वसपोलयात मंकाःकथं अभिनन्दन याःगु खः ।
वसपोल भन्तेपिंत लःल्हाःगु अभिनन्दन पत्र भिक्षु राहुलं ब्वनाः न्यंका बिज्याःगु खःसा ज्याझ्वःया प्रमुख व्यक्तित्व भिक्षु ज्ञानपूर्णिक महास्थविरया जीवनी, वसपोलया व्यक्तित्व व वसपोलं बुद्धशासनिक ख्यलय् बियाबिज्याःगु योगदानयात बारे लुम्बिनी विकास कोषया पुलांम्ह उपाध्यक्ष निग्रोधं जानकारी बियाबिज्याःगु खः ।
ज्याझ्वलय् अनागरिका संघया भिक्षुणी धम्मावती गुरुमां, धर्मोदय सभाया नायः बौद्ध विद्वान यज्ञमानपति वज्राचार्य, नेपाल परम्परागत बौद्ध धर्म संघया नायः प्रा. डा. नरेशमान वज्राचार्य, संघीय संसदया कृष्णगोपाल श्रेष्ठ, कृष्णलाल महर्जन, प्रदेश सांसद शोभा शाक्य, येँ महानगरपालिकाया प्रमुख विद्यासुन्दर शाक्य, लुम्बिनी बौद्ध विश्वविद्यालयया उपकुलपति प्रा. डा. हृदयरत्न वज्राचार्य लगायत आपालं भिक्षु, भिक्षुणी उपासक उपासिका नापं बौद्ध संघसंस्था, विहार, गुम्बाया प्रतिनिधिपिनिगु उपस्थिति दुगु खः ।
LEAVE YOUR COMMENTS