‘नीति कार्यक्रमय् संघीयता मदु’

येँ – राष्ट्रपति विद्यादेवी भण्डारीं संसदय् न्ह्यब्वःगु नीति तथा कार्यक्रम संघीयता अःखः जूगु खँ संघीय समाजवादी फोरमया सहअध्यक्ष राजेन्द्र श्रेष्ठं कनादीगु दु । नीति तथा कार्यक्रमय् लोकतन्त्र संस्थागत यायेगु खँ न्ह्यथनातःसां संघीय लोकतान्त्रिक गणतन्त्र दुमथ्याःगु टिप्पणी यासें वय्कलं धयादिल, ‘थ्व नीति तथा कार्यक्रमं देशय् वःगु न्हूगु व्यवस्थायात वेवास्ता याःगु दु ।’

वय्कलं केन्द्रीय सरकार, प्रदेश सरकार व स्थानीय निकाय बिस्कं बिस्कं सार्वभौम संस्था खः तर नीति तथा कार्यक्रमय् केन्द्रीय सरकार अधिनस्थ धकाः न्ह्यथनातःगु पाय्छि मजूगु टिप्पणी नं यानादिल । संविधानय् समानुपातिक समावेशीया खँ दुथ्यानाच्वंगु दुसा नीति तथा कार्यक्रमय् समानुपातिक समावेशी खँयात लागू यायेगु कथं मजुसे खालि ‘ध्यान बीगु जुइ’ धकाः जक उल्लेख जूगुलिं सरकारया नियत पाय्छि मजूगु खँ नं वय्कलं कनादिल ।

नीति तथा कार्यक्रमय् गाउँपालिकां यायेमाःगु ज्या तकं दुथ्याकातःगु दु धासें थुकिं स्थानीय निकायया अधिकारयात हाकनं केन्द्रीय सरकार अन्तर्गत तयेगु कुतः सरकारं यानाच्वंगु द्वपं बिसें वय्कलं बियादिल,‘नीति तथा कार्यक्रमयात हे संशोधन याये माःगु आवश्यकता दु ।’