चिनियाँ पर्यटकत अप्वल

येँ –  नेपाः चाःहिउ वइपिं चिनियाँ पर्यटकतय् ल्याः अप्वःगु दु । सन् २०१९ या अक्टोवर महिना लछिया दुने जक १५ हजार ३७ म्ह चिनियाँ पर्यटक नेपाः चाःहिउ वःगु खँ नेपाल पर्यटन बोर्डं धाःगु दु । थ्व ल्याः थगुनेया थ्व हे अवधिया तुलनाय् ११.५ प्रतिशतं अप्वः खः ।
बोर्डया तथ्यांक कथं सन् २०१८ य् १२ लाखया ल्याखय् विदेशी पर्यटक नेपाः दुहां वःगु खः ।

थ्व अवधि दुने चीनं जक छगू लाख ६० हजार पर्यटक नेपाः चाःहिउ वःगु खः । सन् २०१९ या अक्टोवर महिनाय् भारतं १२ हजार ७०६ म्ह पर्यटक नेपाः दुहां वःगु दु । थ्व ल्याः नं थगुनेया थ्व हे अवधिया तुलनाय् ९ प्रतिशतं अप्वः खः । अक्टोवरय् चिनियाँ पर्यटक अप्वःसां नेपालय् दुहां वःपिं मुक्कं पर्यटकया ल्याखय् धाःसा भारत हे न्ह्यःने लानाच्वंगु दु ।

सन् २०१९ या झिला दुने १ लाख ६९ हजार ९५२ म्ह भारतीय पर्यटक नेपाः दुहां वःगु दुसा थ्व हे अवधि दुने चीनं १ लाख ३४ हजार २८१ म्ह जक पर्यटक नेपाः दुहां वःगु दु । अक्टोवरय् जक मुक्कं छगू लाख ४३ हजार ८७० म्ह विदेशी पर्यटक नेपाः दुहां वःगु खः । थगुने थ्व हे अवधीइ १ लाख ३० हजार ७०४ म्ह पर्यटक नेपाः वःगु खः ।

भारत नेपाःया पर्यटनया निंतिं मू स्रोत बजाः खःसा चीन निगूगु थासय् दु । नेपालय् दकलय् अप्वः पर्यटक भारतं दुहां वयेगु यानाच्वंगु दु । सन् २०१८ य् भारतं जक २ लाख ४३८ म्ह भारतीय नागरिक नेपाः चाःहिलेत वःगु खँ बोर्डं धाःगु दु । वंगु असोज २५ व २६ य् चिनियाँ राष्ट्रपति सी जिनपिङं नेपाःया निन्हुयंकंया राजकीय भ्रमण यानादीगु खः ।

उगु भ्रमण लिपा चिनियाँ पर्यटकया ल्याः अप्वया वनाच्वंगु दु । अक्टोवरय् भारतीय पर्यटकया तुलनाय् चिनियाँ पर्यटक अप्वःगु खँ बोर्डं धाःगु दु ।चिनियाँ पर्यटकत दकलय् अप्वः विश्वया थीथी देशय् चाःहिउ वनेगु याः, अथे खःसां नेपालं धाःसा चिनियाँ पर्यटकतय्त बांलाक दुत हयेफयाच्वंगु मदुनि । दँय् १५ करोड चिनियाँ चाःहिलेत चीनं पिहां वनेगु याः ।

थुकिया छुं ब्व जक नेपाः हयेफुगु खःसां नेपाःया पर्यटन ख्यलय् महत्वपूर्ण योगदान जुइ । सरकारं सन् २०२० यात नेपाल भ्रमण दँ घोषणा यानाः थ्व अवधिइ २० लाख पर्यटक नेपाः दुत हयेगु तयारी यानाच्वंगुदु । जःलाखःला देय् चीनं जक न्यागू लाख पर्यटकयात नेपालय् लसकुस यायेगु धयाच्वंगु दु ।

झिला दुने झिगू लाख पर्यटक
सन् २०१९ या झिला दुने थ्यंमथ्यं झिगू लाख विदेशी पर्यटक नेपाः चाःहिलेत वयेधुंकूगु खँ बोर्डं धाःगु दु । अध्यागमन विभागयात उद्धृत यासें बोर्ड बिउगु तथ्यांक कथं सन् २०१९ या जनवरी निसें अक्टावेर तक मुक्कं ९ लाख ७५ हजार ५५७ म्ह विदेशी पर्यटक नेपाः दुहां वःगु दु ।मुक्कं पर्यटक मध्ये हवाई मार्ग जुयाः ८ लाख २० हजार ४९९ म्ह, स्थलमार्ग जुयाः १ लाख ५५ हजार ५८ म्ह पर्यटक नेपाः दुहांवःगु खः ।

थ्व थगुनेया थ्व हे अवधिया तुलनाय् ८ प्रतिशतं वृद्धि खः । सन् २०१८ या झिला दुने ९ लाख ३ हजार ५३९ म्हेसिनं जक नेपाः भ्रमण याःगु खः । थुगुसी झिला दुने युरोपं १ लाख ९९ हजार ३ म्ह पर्यटक नेपाः वःगु खःसा थगुने युरोपं १ लाख ९८ हजार ४९३ म्ह पर्यटक नेपाः दुहां वःगु खः । अमेरिका व क्यानडां थुगुसी झिला दुने ९८ हजार ४०३ म्ह पर्यटक वयेधुंकूगु दु ।

एशियाली देसं दुहांवःपिं धाःसा म्होचा ल्याखय् जक अप्वःगु खनेदु । विशेष यानाः चाइनिज ताइपेइ व थाइल्यान्डं ३९.५ व ३२.९ प्रतिशत अप्वः पर्यटक दुहां वःगु तथ्यांक दु । ताइपेइपाखें ११ हजार ३४८ म्ह व थाइल्यान्डपाखें ३९ हजार ६०८ म्ह पर्यटक नेपाः दुहांवःगु दु ।

मुक्कं पर्यटक दुहां वःगुयात स्वयेबलय् दक्षिण एशियाली देय् भारत, चीन व बंगलादेशं २५.६५ प्रतिशत अप्वःगु खनेदु । एशियाली देय्पाखें २६.५९ प्रतिशत, युरोपपाखें २०.४ प्रतिशत अप्वः पर्यटक दुहां वःगु खनेदु ।

 

सम्बन्धित बुखँ

LEAVE YOUR COMMENTS