ने. सं. ११४३ चौलाथ्व पारू -

शैक्षिक दसिपौ धितो तयाः त्यासा बीत बैंकत अनिच्छुक

येँ – शैक्षिक प्रमाणपत्र ब¥हः तयाः विद्यार्थीतय्त ज्या यायेगु लागिं त्यासा बीगु धकाः सरकारं हःगु कार्यक्रमयात वाणिज्य बैंकतय्सं न्ह्यसः तःगु दु । शैक्षिक प्रमाणपत्र ब¥हः तयाः त्यासा काःम्ह सुं विद्यार्थीं छुं जुयाः त्यासा मपुल धाःसा उगु ध्यबा सुनां पुलीगु धकाः बैंकतय्सं न्ह्यसः तःगु खः । काःगु ध्यबा लिहां वइगु ग्यारेन्टी मवइगु खःसा बैंकतय्सं अज्याःगु त्यासा बी मफइगु संकेत नं बिउगु खँ सूत्रं धाःगु दु ।
लगानी सुरक्षित जुइगु ग्यारेन्टी मदइगु खःसा शैक्षिक प्रमाणपत्रया भरय् बैंकतय्सं त्यासा बी मफइगु खँ न्ह्यःने हःगु कारणं आः थ्व कार्यक्रम तकं छु जुइगु खः धाये मफइगु खँ सूत्रं कंगु दु ।

बैंकतय्पाखें थज्याःगु सरोकार वयेवं सरकारं जोखिम न्यूनीकरण यायेत नियमावलीयात तसकं कडा यायेगु तयारी यानाच्वंगु दु । नापं गुलिखे खँ आःया नियमावलीइ हे स्पष्ट दु धकाः राष्ट्र बैंकं धायेगु याःसां बैंकत धाःसा विश्वस्त मजूगु खँ सूत्रं धाःगु दु ।

सूत्रतय्सं धाः कथं बैंकतय्सं यदि थःथाय् कया यंकूगु अज्याःगु त्यासा मपुल धाःसा उमिसं धरौटी तया थकूगु शैक्षिक प्रमाणपत्र सरकारयात बुझे यानाः उमिके काये माःगु दां सरकारं पुला बीगु जुल धाःसा जक अज्याःगु त्यासा बी फइगु प्रस्ताव न्ह्यःने यंकाच्वंगु दु । विद्यार्थीतय्सं कम से कम नं स्वंगू किस्ता तक ध्यबा पू मवल धाःसा उमिगु शैक्षिक प्रमाणपत्र सरकारं कयाः बैंकयात ध्यबा पुला बीगु व्यवस्था जुइमाःगु खँ न्ह्यथनाच्वंगु दु ।

बैंकतय्सं न्ह्यःने तये हःगु थज्याःगु शर्तया कारणं शिक्षित बेरोजगारतय्त थःगु हे देशय् रोजगारी सिर्जना याकेगु सरकारया थ्व योजनाय् न्ह्यसःचिं पिदंगु खँ धाःगु दु ।लुमंकेबहः जू, थ्व स्वयां न्ह्यः भुखाय् पीडिततय्त २ प्रतिशत जक ब्याज कयाः त्यासा बीगु खँय् नं बैंकतय्सं लगानी सुरक्षाया ग्यारेन्टी माग यायेवं सरकारया उगु योजना फ्यासुया वंगु खः ।