ख्वप नपापाखें मोहनि लक्षित बजाः अनुगमन

ख्वप (नेपालभाषा टाइम्स) – ख्वप नगरपालिकां न्ह्यःने वयाच्वंगु नखःयात लक्षित यानाः बजाः अनुगमन तीव्र याःगु दु। नगरपालिकां मोहनि, स्वन्ति, नेपाल संवत् थेंज्याःगु तःजिगु नखः न्ह्यःने थ्यनेवं बजाः अनुगमनयात तीव्रता बिया हःगु खः ।

बजारय् खाद्यान्न लगायत दैनिक उपभोग्य हलंज्वलनय् अखाद्य वस्तु ल्वाकछ्यायेगु,म्याज फुइधुंकूगु वस्तुइ न्हूगु मितिया ट्याग तयाः विक्री यायेगु, अखाद्य वस्तु मीगु, म्याद फुगु सामग्री विक्री यानाच्वंगु धइगु गुनासो वयेवं नगरपालिकां उकथं बजाः अनुगमनयात तीव्रता बिया हःगु खः ।

ख्वप नगरपालिकाया अनुगमन समितिया संयोजक राजकृष्ण गोराया नेतृत्वया पुचलं कमलविनायक, च्याम्हासिंह, लान्चाफल्चा लगायत नगरया थीथी थासय् बजाः अनुगमन याःगु खः । पुचलं करिब निगू दर्जन क्षेत्रय् याःगु अनुमगनया झ्वलय् अप्वःथें पसलय् म्याद फुइधुंकूगु सामान मियाच्वंगु, खाद्य विभागया अनुमति पत्र कयामतःगु, खाद्य वस्तुइ अखाद्य वस्तु ल्वाकछ्यानातःगु, पसः दर्ता व नवीकरण मयासे संचालन यानातःगु मूल्यसूची तयामतःगु लूगु जानकारी अनुगमन पुचलं बिउगु दु ।

अनुगमन पुचलं उकथंया अखाद्य वस्तु दक्वं जफत यानाः नष्ट यासें पसः नवीकरण यायेत, दर्ता यायेत, विभागया अनुमति कयाः पसः संचालन यायेत नापं लेबल, मूल्यसूची तयेत नं निर्देशन बिउगु दु ।