विकासे सिद्धान्तया पुष्टि !

विकासया युग थौं । विकासया जमाना । थौंया विकास खासा पहलं जुइ मजिउ । जेटया गतिं न्ह्यायेमाः । म्हिगः द्वःछि दँ बिकाः नं याये मफुगु विकास थौं याकनं याये फयेकेमाः । उकिं थौं विश्वय् विकासया ख्यलय् धेंधेंबल्लाः कासा जुयाच्वंगु दु । तँछाडमछाड खने दयाच्वंगु दु । विकासया नामय् थौं मनूत थुलि अन्ध जुइ ! छु याये जिउ ? छु याये मजिउ ? मनुखं तिफ्याये मपूm ।

मिखा तिसिनाः विकासया लँ लिनाच्वंगु दु । मिखा तिसिनाः याइगु विकासं गन थ्यंकीगु खः ? थौं सुयातं चिउताः मदु । चिन्ता मदु । कथित विकासया धुनं आडम्बरं थौंया मनू थुलि ग्रस्त, थुलि पथभ्रष्ट, इमिसं विकास छु विनास छु छुटे याये मफयेधुंकूगु दु । थौं विकासे तरकारि, विकासे नेता, विकासे राजनीतिक दर्शन ……. विकासे नगरबधू, अनेककथंया विकासे वस्तुत खने दइ ।

धाये थौं स्वयम बजार हे विकासे वस्तुतसें जायेधुंकूगु दु । विकासे फलफुल । विकासे नसाज्वलं । विकासे विचार ……. ।छन्हु न्ह्यः । रामतोरिया थें च्वंगु तुसि । तुसियात इन्जेक्सन बी । कन्हय्कुन्हु व तुसि निगू केजीया जुया बी । अथे हे सन्त्रासि पाय् ग्वःगु फसि । विकासे रसायनिक इन्जेक्सन बी । किलो किलोया फसि जुयाः लुइ ।

चां चां हे तुसि, फसिं जादूगरी विकास याइ । बजारय् यनी । तरकारि बन्जाःतसें किलो किलोया हिसाबं तुसि, फसि मी । थज्याःगु विकासे तरकारि मियाः चां चां हे तरकारि बन्जाःत तःमि जुइ । उपभोक्तातय् निंतिं थुपिं हानिकारक जुइ । इन्जेक्सन बियाः कृत्रिम विधिं विकास यानातःगु वस्तुत यथार्थय् अखाद्य जुइ । विषाक्त उपभोक्तातय् स्वास्थ्ययात घातक ।

तर थौं विकासया युग । युगं हःगु विकासे वस्तुयात नकारे याये सुया तागत ?! याःसां याइम्ह विकास विरोध जुइ ! उपभोक्तातय्त निं मनिंया चिउताः सुनां तइ ? थौं थज्याःगु हे विकासे वस्तुतय् व्यापारीत मालामाल जुइ । धनाढ्य जुयाः समाजय् इज्जतदार जुइ । थःगु स्वार्थया निंतिं देय्या प्रशासन, कर्मचारी, नेतातयत थःगु बसे तये फुपिं जुइ । लही फुपिं जुइ ।

थौंकन्हय् उमेर हे मदुनिपिं मिसा मस्तय्त इन्जेक्सन बियाः मत्यवं हे ल्यासे यानाः बेश्यावृत्तीइ छ्यलीपिं गिरोहत सक्रिय जुयाच्वंंगु दु ।

विकासे खाद्यवस्तुया नामय् विषालु रासायनिक तत्वत छ्यलाः आकर्षक स्वादिष्ट यानातःगु अखाद्य वस्तुत आम जनता, उपभोक्तातय् निंतिं विष समान खः धकाः सरकार, नेतातय्सं सिउ । खाद्य विशेषज्ञतय्सं सरकारया ध्यान थुखेर इलय्व्यलय् सालेगु याः । तर धन आर्जन हे मूल लक्ष खंकाः व्यापार याना जुइपिनि गोप्य रुपय् सरकारी प्रशासन, राजनीतिक शक्तिलिसे साँठगाँठ दयाच्वनीगुलिं इमित संके फइगु स्थिति देशय् मदु ।

थौं जनतां म्वायेगु नामय् हानिकारक नसाज्वलंत नये माःगु बाध्यता फयेमाः । बिसिउँ वनेगु लँपु मदु । बुखँ ब्वने । तसकं नुगलय् घाः लाकीगु । इन्जेक्सन बियाः तुसि फसियात कृत्रिम धंगं तग्वः याये थें थौंकन्हय् उमेर हे मदुनिपिं मिसा मस्तय्त इन्जेक्सन बियाः मत्यवं हे ल्यासे यानाः बेश्यावृत्तीइ छ्यलीपिं गिरोहत सक्रिय जुयाच्वंंगु दु ।

अबोध मिसामस्तय्त इन्जेक्सन बियाः अ·प्रत्य·त बल थें फुले यानाबी । अले इमित नगरबधूकथं यौन व्यवसायय् फसे यानाबी । थ्व बाल यौन शोषणया पराकाष्ठा खः । अक्षप्य अपराध खः । तर थौंकन्हय् थज्याःगु जघन्य अपराधयात थःगु कमे याना नयेगु थलकथं छ्यलाच्वंपिं दुष्टत भूमिगत रुपय् सक्रिय खनेदु ।

थौं प्यखेरं जनचिन्ताया विषय जुइ । थज्याःगु चरम बाल यौन शोषयाप्रति थौं आम जनता संवेदनशील जुइमाःगु दु । अपरिपक्व, क्यातुपिं मिसामस्तय्त छ्यलाः विकासे नगरबधूतय् बजाः संचालन याइपिं गिरोहतय्त इलय् हे सरकारं निम्त्यान्न यायेमाः । थौं आम जनताया तीव्र अपेक्षा जुइ ।

थौं देशय् विकासे राजनीतिं नं द्रुत गति कयाच्वंगु दु । इन्जेक्सन बियाः कृत्रिम धंगः फुले यानातःगु कम्युनिज्म, समाजवाद प्रजातन्त्रं थौं देय्या राजनीतिक बजाः जायाच्वंगु दु । नेपाःया राजनीतिक बजारय् थौं अर्गानिक राजनैतिक सिद्धान्त खनेमदु । कृत्रिम रसायनिक इन्जेक्सन बियाः चांचां हे फुले यानातःगु तुसि, फसि थें देशय् थौं राजनीतिक बजारय् खनेदइ ।

पिनें आकर्षक खने दया नं यथार्थय् कृत्रिम नक्कली । थौं राजनीतिक बनोट अर्गानिक सिद्धान्तया पूर्ण अभाव । ‘जि ओरिजिनल माओवादी मखु, सक्कलि माक्र्सवादी मखु’, हालय् छम्ह शीर्षस्थ माओवादी नेतां याःगु थ्व स्वीकारोक्तिं देशय् विकासे सिद्धान्तया जगजगी जुयाच्वंगु खँया पुष्टि याइ । जुइ ।