ने. सं. ११४४ कौलाथ्व पारू - नःलास्वनेगु

गोकुल….. ग्याये म्वाः !

थौंकन्हय् । टेलिभिजनय् कमेडी च्याम्पियन नांया ज्याझ्वः वइ । ज्याझ्वः न्ह्यइपुसे च्वं । ख्यालिन्हिलिया ज्याझ्वः खः थ्व । थौंया देश, काल परिस्थितियात कयाः मार्मिक प्रस्तुतित जुइ व ज्याझ्वलय् । छगू एपिसोडय् । छम्ह प्रस्तोतां नवाःगु संवाद लुमनी । ‘सुनां धाइ नेपालय् कर्मठ नेतात मदु धकाः ?’ विश्वय् हे सुनानं ध्वय् मफुपिं नेतातदु झीगु देसय् । सघन उपचार कक्षय् च्वनाः, द्यनाः देय्या नेतृत्व हाँके यायेफुपिं नेतात दु । थ्व देसय् । थ्व नेतृत्व विश्वया निंतिं उदाहरणीय मखुला ? नेपाःया निंतिं विश्वया न्ह्यःने गौरवया खँ मखुला ? व संवाद न्यने । प्रस्तोताया थुकी थःगु अर्थ अनेक दयेफु । स्वाभाविक ।

तर । जिं व संवाद न्यने । व्यंग्य पक्षया चिउताः मतया । न्हिलेत मस्वया । प्रस्तुतिइ छुं सत्यता दु । छुं तथ्य नं दु । मनन योग्य । उकी हे ध्यान केन्द्रीत याना । ख नं खः । देय्या प्रमजुया निगः निगः जँलास्यें ज्या मयाये धुंकल । डाइलोसिसया भरय् । छक्वः जँलास्येँ प्रत्यारोपण यायेधुंकल । प्रत्यारोपित जँलास्यें नं ज्या मबी धुंकल । इलय्व्यलय् मफयाच्वनी । देशविदेशय् उपचारया लागि वनाच्वनी । देशय् नं आकस्मिक सघन उपचारया निंतिं अपरझट अस्पतालय् वनाच्वनी । यंकी ।

प्रधानमन्त्री ओली अस्वस्थ । थ्व थौंया यथार्थ खः । तर अस्वस्थताया कारणवस नं प्रधानमन्त्रीजुं थःगु सक्रिय नेतृत्व बियाच्वंगु दु । गले मजू । हरेक ज्याझ्वलय् वनाच्वनी । भाषण बियाच्वनी । घन्टौं नवानाच्वनी । मजाक शैली छ्यली । जनतायात न्हिइकाच्वनी । अस्वस्थतां वय्कःया मनोबल भ्याः भचा हे म्हो मजू । जूगु खनेमदु । थःगु प्रस्तुति उलि हे सशक्त । उलि हे शानदार । देय्या नेतृत्व कया हे च्वनी । थःगु नेतृत्वय् आत्मविश्वास क्यना हे च्वनीतिनि ।

गुलिखे आत्मबल मदुपिं मदुपिं कमजोर मनूत ज्वर भचा वलकि ‘जि सी न’ धकाः ग्यानाः ल्हातुति संकेगु हे त्वःताः चातु वानाच्वनी । प्रधानमन्त्री ओलीया जँलास्येँ निगलं ज्या मबिलं नं निर्भिक, निश्चिन्त । देय्यात हाँके याना च्वनतिनि । देय्यात नेतृत्व बीगु चाःचूया खँ मखु । स्वस्थ नेतायात नं अःपुइमखु ।

तर प्रधानमन्त्री ओलीजुं थःगु असामान्य स्वास्थ्यस्थितिया बावजुद नं देय्या सारथी जुयाः नेतृत्व प्रदान यानाच्वनी । थ्व असाधारण तथ्य खः । शायद विश्वय् थःगु अस्वस्थतायात किन्चित वास्ता मयासे एकचित्त मनं देय्यात नेतृत्व बीगु आँट दुम्ह प्रधानमन्त्री केपीओलीजु हे जुइला ? सम्भवत खयेफु । गुलिसिनं कुंखिनी । थन प्रधानमन्त्री ओलीया अदम्य मनोबल साहसया खँ मखु । थ्व वय्कःया शक्ति पिपासा व महत्वकांक्षाया छुमां खः ।

थःके दुगु असाधारण सुखसुविधां थना बिउगु मनोबल खः । कुं खिनीपिनि नं थःथःगु हे तर्क दइ । गुलिसिनं शंकाः नं यायेफु । धाथें वय्कःया स्वास्थ्य उलि गम्भिर हे मखुला ? थ्व फुक्क राजनीतिक चालबाजी जकं खःला ? हल्लाकथं जक वय्कःया स्वास्थ्य चिन्ताजनक धइगु छाप जनमानसय् तयाच्वंगु खः ला ? तर वय्कःया गतिविधिं क्यनी
वय्कःया स्वास्थ्यावस्थां देय्यात नेतृत्व बी फु नि ।

तर थौंकन्हय् देशय् न्हूगु प्रकरण वयाच्वंगु दु । गोकुल प्रकरण । थःगु खतरनाक अस्वस्थतां नं मबिउगु धोखा, संके मफुगु मनोबलयात गोकुल प्रकरणं प्रधानमन्त्रीयात खतरनाक चुनौति जुया वयाच्वंगु आशंका मनूतय्सं याना हयाच्वंगु दु । अस्वस्थतां मखु आः प्रधानमन्त्रीजुयात गोकुल प्रकरणं गन थ्यंकी ! आम जनताय् तीव्र जिज्ञासा, न्ह्यसः जुया बिउगु दु । हिन्दीइ छगू उखान दु ‘मै नें ठगा सारा दिल्ली, मै को ठगति घर कि बिल्ली ।’

थ्व उखानया शाब्दीक अर्थ कयादीमते । आसय जक थुइकादिसँ । संसारया इतिहासय् अनेक जुजु, महाराज, ख्याति प्राप्त नेतात थःगु चलाखिं अनेक उपलब्धि हासिल यायेत सफल जुइ । तर इमि पतन छम्ह सामान्य मनूया चंगुलय् फसे जुयाः जुइ । नेतातय् जःखः विश्वास पात्रकथं भातत वयाच्वनी । भाततय् प्रशंसां नेतात उत्तेजित जुइ । जालय् क्यनी । पतन जुइ । स्वास्थ्यया कारणं स्वयां आः गोकुल प्रकरणं प्रधानमन्त्री ओलीया राजनीतिक भविष्यया बारे गाइँगुइँ खँ न्यने दइ । गोकुल प्रकरण नं निन्हु प्यन्हुया हल्ला जक खः । सामसुम जुया वनी । यक्वसिया निष्कर्ष जुइ । धाइ । थौं देय् भ्रष्टाचार विना म्वाये फइमखु । देय् म्वाका तयेत नं भ्रष्टाचार अनिवार्य जुइधुंकल । गोकुलया भ्रष्टाचार नं देय् म्वाकेगु अभियान अन्तर्गतया साहसी पलाः खः । देय्यात जीवन्त यायेत स्वइम्ह गोकुलयात देशपे्रमी प्रमजुं संरक्षण छाय् मयाइ । यायेमाः । अदालतं मुक्ति बी ।