भक्तपुर साहित्यिक समाजय् न्हूगु ज्यासना पुचः

ख्वप(नेपालभाषा टाइम्स)- भक्तपुर साहित्यिक समाजया नीप्यक्वःगु साधारणसभा व अधिवेशन जुल । उगु अधिवेशनं समाजया न्हूगु नेतृत्व नं ल्यःगु खः ।
समाजया अध्यक्ष राजुराम मुनंकःमिया सभापतित्वय् जूगु ज्याझ्वःया उलेज्या समाजसेवीलिसें समाजया मानार्थ दुजः कृष्णलाल प्रधानं यानादीगु खः । ज्याझ्वलय् नवासें मूपाहां प्रधानं भाषा, कला, साहित्यया ख्यलय् समाजया योगदान च्वछायेबहजू धयादिल । लिसें वय्कलं सकारात्मक लक्ष्य प्राप्तिया निंतिं छगू निश्चित उद्देश्य ज्वनाः न्ह्याः वन धाःसा अवश्य नं सफलता चूलाइ धयादिल ।

विशेष पाहाकथं झायादीम्ह भक्तपुर विकास सहयोग संघया विशिष्ट दुजः राजाराम जोशीं ख्वप देय्या विकासया निंतिं सकलें दत्तचित्त जुयाः लगे जुइत इनाप यानादिल ।
साधारणसभाय् समाजया सल्लाहकार काशिराम विरस, निर्वाचित अधिकृत माणिकबाबु ग्वंगः, पशुपतिभक्त राय, पुरुषोत्तम प्रजापति, राजेन्द्र चित्रकार, उषा के. सि., चन्द्रनारायण श्रेष्ठं नं थःथःगु नुगःखँ तयादीगु खः ।

ज्याझ्वलय् कार्यवाहक सचिव श्याम गैंडां वार्षिक प्रतिवेदन व कोषाध्क्ष रन्जिता थापां आर्थिक प्रतिवेदन न्ह्यब्वयादीगु खःसा सहलह लिपा उकियात सर्वसम्मतं पारित याःगु खः ।

निगूगु चरणय् जूगु संघया न्हूगु ज्यासना पुचःया ल्यज्याकथं मुनंकःमियात नं हाकनं नायः ल्यःगु दुसा सचिवय् पुरुषोत्तम प्रजापति, कोषाध्यक्षय् गुह्येश्वरी शाक्य व दुजलय् रन्जिता थापा, राजेन्द्र चित्रकार, सूर्यलक्ष्मी भोमी व ईश्वर थोकरयात ल्यःगु दु ।