जर्मनीइ न्हूदँया लसताय् नेवाः भ्वय् व सांस्कृतिक ज्याझ्वः
येँ – पासा पुचः जर्मनीया ग्वसालय् नेपाल संवत् ११४० न्हूदँया लसताय् फ्र्यांकफर्टय् नेवाः सांस्कृतिक ज्याझ्वःलिसें नेवाः भ्वय् ज्याझ्वः जर्मनय् च्वंपिं नेवाःतय्सं नेपाल संवत् ११४० न्हूदँया लसताय् थ्व हे वंगु कछलाथ्व पंचमि कुन्हु न्हूदँ नापं न्हापांखुसी नेवाः भ्वय् व सांस्कृतिक ज्याझ्वः तःजिक ग्वसाः ग्वःगु खः ।
जर्मनीया थीथी सहरय् च्वनाच्वंपिं नेवाःलिसें गैर नेवाःतय्सं उत्साहजनक रुपं ब्वति काःगु ज्याझ्वलय् थीथी सांस्कृतिक व सांगीतिक ज्याझ्वः न्ह्यब्वःगु खः । नेपाल संवत् ११४० न्हूदँ क्यंगु लसताय् पुचःया नायः शंकर महर्जनं भिंतुना देछानादिल । थःगु देय् त्वःताः तापाक च्वनाच्वंपिं नेवाःतय्सं न्हू पुस्तां झीगु थःगु भाषा, कला, संस्कृति, संस्कारयात सयेके सीका तये फयेमा धकाः थुकथंया ज्याझ्वः यायेमाःगु खँय् बः बियादिल ।
ज्याझ्वलय् वय्कलं नेवाः नसात्वँसा, नेवाः समाजय् सगंया महत्व व उकिया विशेषता, नेपाल संवत्, म्हपुजा व नेवाः झ्वःभ्वय्या महत्वयात कयाः नं जानकारी बियादीगु खः । फ्र्यांकफर्ट सहरय् हे दकलय् न्हापांखुसी थुकथं नेवाः भ्वय् व सांस्कृतिक ज्याझ्वः याये खंगुलिं थःनापं पुचःया सकलें दुजःपिं नं अतिकं लय्ताःगु वय्कलं कनादिल ।
ज्याझ्वलय् मूपाहांकथं झायादीम्ह वल्र्ड नेवाः अर्गनाइजेसनया संस्थापक नायः नापं सल्लाहकार डा. बालगोपाल श्रेष्ठं नेवाः समाजय् झ्वः भ्वय्या महत्व व नेपाल संवत्या इतिहासयात कयाः कुलादीगु खः । देय्या नामं नीस्वनातःगु संवत् नेपालय् बाहेकं विश्वय् गुगुं नं देशय् मदुगु व थ्व नेपाःया थःगु हे मौलिक संवत् जूगु खँ स्पष्ट यानादिसें नेपाल संवत् नेवाःतय्गु जक खः धकाः गुगु भ्रम ब्वलंकेगु ज्या जुयाच्वन, उकिया लिउलिउ सुं नं वने मजिउगु वय्कलं धयादिल ।
थःगु हे देय्या नामं स्वनातःगु सवंत दयेक दयेकं नं उकियात मछ्यःसे नेपाल सरकारं भारतं आयातीत विक्रम संवत् छ्यलेगु यानाच्वंगु नेपाःया राष्ट्रियताया निंतिं ल्वःगु खँ मखु धासें नेपाःया राष्ट्रियताया निंतिं नं सरकारी ज्याखँय् थ्व संवत्यात छ्यलाबुलाय् हयेमाःगु खँय् वय्कलं बः बियादिल ।
ज्याझ्वलय् ब्वति कायेत वःपिं सकसितं जाकिसिन्हः तिकाः ह्याउँगु व तुयुगु क्वखालिसें ख्यें सगं बियाः लसकुस यायेगु ज्या जूगु खः ।
जर्मनय् च्वनाच्वंपिं नेवाःलिसें राई, लिम्बु, तामाङ, गुरुङ लगायतया जनजातिनापं ब्रम्हु, क्षेत्री व जर्मन नागरिकत नापं यानाः स्वलं मल्याकया सहभागिता दुगु खः ।
सानु महर्जन व अर्पणा डंगोलं न्ह्याकादीगु सांस्कृतिक ज्याझ्वलय् नेपालभाषा मथूपिंत खस्, जर्मन व अंग्रेजी भासं भाय् नं ज्याझ्वः न्ह्याकूगु खः । नेवाः, खस् व अंग्रेजी भाय्या म्येँ, हुलाप्याखं नं न्ह्यब्वःगु सांस्कृतिक ज्याझ्वलय्, धिमे प्याखं, लाखेप्याखंयात नगर चाःहिकूगु खः । सांस्कृतिक ज्याझ्वलय् जर्मनया फ्रान्जि त्रोम्मरं नेवाः वसतय् बासुरि व रोबर्टं सितार थानाः मालश्री धुन न्यंकादीगु खः ।
ज्याझ्वलय् नच्चापिं मस्तय्सं परम्परागत नेवाः म्येँय् हुलाप्याखं न्ह्यब्वःगु खः ।अथे हे सांस्कृतिक ज्याझ्वलय् जर्मनी व बेलायतया लन्दनय् च्वंगु इजि ब्यान्डया खगेन लिम्बु, ध्रुव शाक्य, रविन्द्र श्रेष्ठ, विक्रम गोपाली, किरण श्रेष्ठ, चन्द्र श्रेष्ठ, सुलता राईपिंसं सांगीतिक ज्याझ्वः न्ह्यब्वयादीगु खः ।
उगु ज्याझ्वलय् गैरआवासीय नेपाल संघ (एनआरएनए)या नवनिर्वाचित नायः कुमार पन्त, पुलांम्ह नायः जिबा लामिछानेलिसें वय्कःया छेँजःपिंसं नेवाः वसतय् ब्वति कयादीगु खः ।
ज्याझ्वःया दकलय् लिपांगु ब्वय् ब्वति कायेत वःपिं सकसितं नेवाः भ्वय् नकेगु ज्या जूगु खःसा नेवाः भ्वय् ज्वरे यायेगु निंतिं म्रिस्तिना महर्जनया संयोजनय् नानु महर्जन, इला श्रेष्ठ व सन्तोष अर्यालं विशेष ग्वाहालि यानादीगु खः । ज्याझ्वः ताःलाकेत शंकर महर्जन, चैत्यरत्न कंसाकार व जगत जोशीया पुचलं ग्वाहालि यानादीगु खः ।
LEAVE YOUR COMMENTS