‘थ्व संविधान झिदँ हे टिके जुइ मखु’

येँ – न्हूगु संविधान जारी जुइधुंकाः नेपाःया आदिवासी जनजाति आन्दोलन गन थ्यन व आः गुकथं न्ह्याः वने माली धइगु विषयय् म्हिगः नेपाल आदिवासी जनजाति महासंघं येँय् छगू वृहत् राजनीतिक सम्मेलन यात ।

ज्याझ्वलय् मूपाहां कथं झाःम्ह सभामुख कृष्णबहादुर महरां संविधान जारी जुइधुंकाः प्राप्त जूगु उपलब्धीयात सुरक्षित यानाः आदिवासी जनजातित न्ह्याः वने माःगु व थप अधिकार कायेगु लागिं संविधान संशोधन याये फइगु बिचाः प्वंकादिल ।

संघीय समाजवादी फोरमया सहअध्यक्ष राजेन्द्र श्रेष्ठं विश्वन्यंकंया कम्युनिष्टत माक्र्सवादी, लेनिनवादी वा माओवादी जुइ तर नेपाःया कम्युनिष्टत धाःसा ब्राम्हणवादी जुयाच्वन धयादिल । आः लागू जुयाच्वंगु न्हूगु संविधान यदि संशोधन मयात धाःसा थ्व संविधान झिदँ हे टिके मजुइगु ख्याच्वः नं वय्कलं बियादिल ।

ज्याझ्वलय् सत्तारुढ पार्टी नेपाल कम्युनिष्ट पार्टीपाखें देव गुरुङ व प्रमुख प्रतिपक्षी नेपाली कांग्रेसपाखें जीपछिरिङ लामां न्ववानादीगु खः ।
नीप्यक्वःगु विश्व आदिवासी दिवसया लसताय् नेपाल आदिवासी जनजाति महासंघ व संघीयताय् आधारित संघीय गठबन्धनया मंकाः ग्वसालय् उगु ज्याझ्वः जूगु दु ।

निन्हुयंकं जुइगु थ्व ज्याझ्वः लिपा आदिवासी जनजातिया घोषणापत्र समेत जारी जुइगु खँ धाःगु दु ।