समुदाय–प्रहरी साझेदारी अवधारणा निःशुल्क स्वास्थ्य जांच व परामर्श ज्याझ्वः

येँ – समुदाय–प्रहरी साझेदारी अवधारणा अन्तर्गत छगू निःशुल्क स्वास्थ्य जांच व परामर्श ज्याझ्वः जूगु दु । येँया तोखा नगरपालिका वडा नं. ९ स्थित ग्वंगःबुँइ च्वंगु हिमालयन वृद्धाश्रमय् वंगु मंगलवाः उगु ज्याझ्वः जूगु खः । महानगरीय प्रहरी परिसर टेकुया सक्रियताय् नेपाल प्रहरी अस्पताल महाराजगंजया चिकित्सकसहितया पुचलं उगु वृद्धाश्रमय् च्वंपिं ज्याथजिथिपिनिगु निःशुल्क स्वास्थ्य परीक्षण यायेगु नापं परामर्श नं बिउगु खः ।

थ्व हे झ्वलय् महानगरीय प्रहरी वृत्त कमलपुखूपाखें खटे जुयावंगु प्रहरी पुचलं घरेलु अय्लाः हयाच्वंगु अवस्थाय् निम्हेसित ज्वंगु दु । प्रहरीं हाकुताँपाखें घरेलु अय्लाः हयाच्वंगु अवस्थाय् गोकर्णेश्वर नगरपालिका १ या सुमन लामा व कालु वाइवायात २० लिटर घरेलु अय्लाःलिसें ज्वंगु खः ।

बा. ९० प २६७३ नम्बरया मोटरसाइकलय् चेक जांच यायेगु झ्वलय् घरेलु अय्लाः तया हयाच्वंगु अवस्थाय् प्रहरीं इमित ज्वंगु खः । थुकथं हे इलाका प्रहरी ज्याकू फम्पिया प्रहरी पुचलं बुधवाः सुथय् फम्पिया थीथी थासय् चेक जांच यायेगु झ्वलय् अन्दाजी ५०० लिटर स्वयां अप्वः घरेलु अय्लाः नियन्त्रणय् काःगु दु । प्रहरी थ्व सम्बन्धय् थप अनुसन्धान न्ह्याकाच्वंगु दु ।